1 րոպեի ընթերցում
ԵՐԵՎԱՆ, 10 ՕԳՈՍՏՈՍԻ, ԱՐՄԵՆՊՐԵՍ: «Սեպտեմբերի 21-ին' Հայաստանի անկախության օրը, կայանալիք ռազմական շքերթում կտեսնենք, թե ինչն է զսպում Ադրբեջանին' գնալ ղարաբաղյան հակամարտության ռազմական ուժով լուծմանը»,- «Արմենպրես»-ի զրույցում նշեց ռազմական փորձագետ Դավիթ Ջամալյանը:
Չբացահայտելով, թե կոնկրետ ինչպիսի զինատեսակներ են ներկայացվելու շքերթում' ռազմական փորձագետը նշեց, որ դրանք լինելու են հակաօդային պաշտպանության, հրթիռային, ռեակտիվ զենիթային համակարգեր: «Դրանք թույլ են տալիս խոցել թշնամուն, կասեցնել նրա ազատ տեղաշարժը, կաշկանդել հակառակորդի մանեւրելու հնարավորությունը: Իսկ թե ավելի կոնկրետ ինչ զինատեսակներ կներկայացվեն հայկական զինված ուժերի կողմից, կտեսնենք շքերթում: Շքերթը կհաստատի, որ հայկական բանակին հաղթելու ադրբեջանական կողմի հայտարարությունները զուտ պատրանք են: Հակառակորդի ռազմաքաղաքական վերնախավը դա շատ լավ հասկանում է»,- ընդգծեց Դ. Ջամալյանը: