2 րոպեի ընթերցում
ԵՐԵՎԱՆ, 3 ՕԳՈՍՏՈՍԻ, ԱՐՄԵՆՊՐԵՍ: Պետք է վրացիներին բացատրել, որ Հայաստանի հետագա թուլացումն ապագայում կբերի Վրաստանի կործանմանը թուրք-ադրբեջանական տանդեմի առջեւ: Այսօր լրագրողների հետ հանդիպման ժամանակ նման տեսակետ հայտնեց քաղաքագետ Լեւոն Շիրինյանը' անդրադառնալով Վրաստանի նկատմամբ տարվող Հայաստանի քաղաքականությանը: «Նրանց պետք է բացատրել, որ այս Հայաստանը նախկինը չէ, այն այսօր ունի շատ մեծ դաշնակիցներ»,- շեշտեց Լ.Շիրինյանը:
Քաղաքագետը կոչ արեց դասեր քաղել Վրաստանի նկատմամբ Հայաստանի առաջին Հանրապետության վարած քաղաքականությունից: «Առաջին հանրապետությունը ծագեց 12 հազար քառակուսի մետր տարածքի վրա եւ մարեց 60 հազար քառակուսի մետրի վրա: Եթե դիտարկում ենք այդ տարիները, ապա ակնհայտ է, որ այդ տարիների վրացական քաղաքականությունն այսօր էլ չի փոխվել»,- կարծում է քաղաքագետը:
Նա անդրադարձավ նաեւ քարոզչական դաշտում տեղի ունեցած վերջին զարգացումներին' նշելով, որ նկատելի է թուրք-ադրբեջանական քարոզչական մեքենայի ակտիվ գործունեությունը: Անդրադառնալով Սերժ Սարգսյանի' վերջերս Ծաղկաձորում արած հայտարարության վերաբերյալ Թուրքիայում բարձրացված աղմուկին' Լ.Շիրինյանը շեշտեց, որ այսպիսով Թուրքիան փորձում է արգելել նոր սերունդներին նույնիսկ ազատ մտածել: