2 րոպեի ընթերցում
ԵՐԵՎԱՆ, 20 ՀՈւԼԻՍԻ, ԱՐՄԵՆՊՐԵՍ: Մ. Մաշտոնցի անվան հին ձեռագրերի թանգարան-ինստիտուտը վերջին տարիներին գտնվում է բուռն զարգացումների փուլում. այն լիովին վերակերտվում է: Այսօր լրագրողների հետ զրույցում նման կարծիք հայտնեց Մատենադարանի տնօրեն Հրաչյա Թամրազյանը' ավելացնելով, որ ավարտին է մոտենում գիտական խոշորագույն համալիրի կառուցապատումը, որին հաջորդելու է կոթողային շենքի վերակառուցումը' բազմաթիվ նոր ցուցասրահների փոխկապակցված համակարգով, որոնք, մշտական եւ փոփոխական ցուցադրություններով, հնարավորություն կտան առավել լիարժեք ներկայացնել Մատենադարանի հարստությունները:
«Մենք մեծագույն ուշադրություն ենք դարձնում Մատենադարանի ֆոնդերի հարստացմանը. հավաքչական աշխատանքներն այս առումով աննախադեպ հաջողություններ են գրանցվում»,- ասաց նա' հավելելով, որ իրենց ուշադրության կենտրոնում են նաեւ վերականգնման աշխատանքները, որոնց մեծ դեր է վերապահված: «Մատենադարանը, որ հայ ինքնության վկայությունը եւ կենսափիլիսոփայության մարմնավորումն է, օր օրի զարգացնում է իր կենտրոնաձիգ ուժը»,- շեշտեց Հ. Թամրազյանը:
Նրա խոսքով' Մատենադարնը վերջին տարիներին գտնվում էր դանդաղ խմորումների եւ թռիչքաձեւ զարգացումների փուլում: «Իսկապես, զարմանահրաշ դեպքերի շղթա է Մատենադարանի պատմությունը, իսկ գիտական նոր մասնաշենքի կառուցումը դրա մեծագույն վկայությունն է»,- ասաց Մատենադարանի տնօրենը: