2 րոպեի ընթերցում
ԵՐԵՎԱՆ,18 ՀՈՒՆԻՍԻ, ԱՐՄԵՆՊՐԵՍ: Նիդերլանդների Ազգային անվտանգության եւ Ռազմավարական հետազոտությունների կենտրոնի ու «Հոլանդական միջազգային բնակարանային երաշխիքներ» հիմնադրամի հրավերով հունիսի 20-ից 22-ը Ազգային անվտանգության խորհրդի (ԱԱԽ) քարտուղար, Ազգային սոցիալական բնակարանային ասոցիացիայի (ԱՍԲԱ) խորհրդի նախագահ Արթուր Բաղդասարյանի գլխավորած պատվիրակությունը կմեկնի Նիդերլանդների Թագավորություն:
Այցի շրջանակներում նախատեսվում են հանդիպումներ Անվտանգության եւ արդարադատության պետքարտուղարի, Նիդերլանդների Թագավորության ազգային անվտանգության խորհրդականի, ինչպես նաեւ Հաագայի Ռազմավարական հետազոտությունների կենտրոնի ղեկավարության հետ: Ինչպես «Արմենպրես»-ին տեղեկացրին Ազգային անվտանգության խորհրդի քարտուղարի մամուլի գրասենյակից, կողմերը կքննարկեն ազգային անվտանգության ոլորտում հայ-հոլանդական համագործակցության խորացմանն ուղղված հարցերի լայն շրջանակ:
Այնուհետեւ հանդիպումներ են տեղի ունենալու սոցիալական բնակարանային կազմակերպությունների հետ, այդ թվում'»ՎՍՎ» երաշխիքային հիմնադրամի, «Հոլանդական միջազգային բնակարանային երաշխիքներ» հիմնադրամի եւ «Վոոնբրոն» սոցիալական բնակարանային կազմակերպության ղեկավարության հետ: Այս հանդիպումների ընթացքում կքննարկվեն սոցիալական բնակարանային ոլորտում հայ-հոլանդական համագործակցությանն առնչվող հարցեր, ինչպես նաեւ կստորագրվեն մի շարք համաձայնագրեր ԱՍԲԱ հիմնադրամի եւ հոլանդական գործընկերների միջեւ Հայաստանում ներդրումային ծրագրերի իրականացման վերաբերյալ: