Կրիպտոարժույթների օգտագործումը դժվարացնում է թմրամիջոցների վաճառքից ստացված գումարների շահառուների բացահայտումը․ ՔԿ նախագահ

Թմրամիջոցների վաճառքից ստացված գումարների փոխարկումը կրիպտոարժույթների և կրիպտոդրամապանակների միջոցով դրանց շրջանառությունը դժվարացնում են հանցավոր շղթայի վերջնական շահառուներին բացահայտելու աշխատանքը։

Ինչպես տեղեկացնում է «Արմենպրես»-ը, այս մասին Ազգային ժողովի մշտական հանձնաժողովների համատեղ նիստում 2027 թվականի պետական բյուջեի նախագծի քննարկման ընթացքում ասել է Քննչական կոմիտեի նախագահ Արթուր Պողոսյանը՝ պատասխանելով պատգամավոր Դավիթ Ղազինյանի հարցին։

Պատգամավորը կարևորել է թմրամիջոցների խոշոր մատակարարներին հայտնաբերելը՝ նշելով, որ պայքարը պետք է հասնի հանցավոր շղթայի հիմնական կազմակերպիչներին։

Պողոսյանն ի պատասխան ներկայացրել է գումարների շարժին հետևելու ընթացքում առաջացող դժվարությունները։ Նրա խոսքով՝ թմրամիջոցների իրացումից ստացված շահույթը փոխարկվում է կրիպտոարժույթների և շրջանառվում կրիպտոդրամապանակներով։

«Չենք կարողանում այդ գումարների հետագծելիությունը հասկանալ և պարզել՝ վերջնարդյունքում այդ գումարն ով կանխիկացրեց կամ ով վերածեց դրամի և տնօրինեց այդ գումարը, որովհետև, իմ կարծիքով, ամենակարևոր օղակն է։ Սա խնդիրներից մեկն եմ ասում ընդամենը»,- նշել է Պողոսյանը։

ՔԿ նախագահի խոսքով՝ նման դժվարությունների բախվում են նաև այլ երկրների իրավապահ մարմինները։ Նա հավելել է, որ որոշ անձանց նկատմամբ քրեական հետապնդում իրականացվում է փողերի լվացման համար, սակայն գումարների վերջնական տնօրինողին հայտնաբերելու խնդիրը պահպանվում է։

Պողոսյանն անդրադարձել է նաև «Տելեգրամ»-ի միջոցով թմրամիջոցների տարածմանը՝ նշելով, որ համապատասխան ալիքները վարող անձանց հայտնաբերելը բարդ է, թեև առանձին բացահայտումներ կան։

Նրա խոսքով՝ այդ խնդիրների լուծման ուղղությամբ պայմանավորվածություններ են ձեռք բերվել նաև ծրագրային ապահովման առումով։