Հայ նկարչուհի Սարկո Մենեի ստեղծագործություններն առաջին անգամ ներկայացվել են Հունաստանում

Աթենքի Kourd Gallery պատկերասրահում բացվել է հայ նկարչուհի Սարկո Մենեի «Floral Meteorites from Armenia» ցուցահանդեսը, որն առաջին անգամ Հունաստանում ներկայացնում է արվեստագետի ստեղծագործությունները։ «Արմենպրես»-ի փոխանցմամբ՝ Հունաստանում Հայաստանի դեսպանությունը հայտնում է, որ իր աջակցությամբ կազմակերպված ցուցահանդեսի բացմանը մասնակցել է ՀՀ դեսպան Տիգրան Մկրտչյանը։

Դեսպանը շնորհավորել է նկարչուհուն և ցուցահանդեսի համակարգող Էլենի Վարոպուլուին, ինչպես նաև շնորհակալություն հայտնել պատկերասրահի ղեկավար Հայկ Քուրդօղլանյանին՝ նախաձեռնության իրականացման համար։

Մկրտչյանն անդրադարձել է Սարկո Մենեի որոշ կտավների՝ հունական դիցաբանության և փիլիսոփայության հետ առնչություններին։ Նա առանձնացրել է արվեստագետի ձգտումը՝ կապ հաստատելու Հունաստանի հետ, որտեղ ծնվել է նրա պապը։

Դեսպանը կարևորել է մշակութային դիվանագիտության դերը հայ-հունական բարեկամության ամրապնդման գործում՝ նշելով, որ նման նախաձեռնությունները հնարավորություն են տալիս ժողովուրդներին ճանաչելու միմյանց, փոխանակելու գաղափարներ և ձևավորելու համագործակցության նոր կապեր։

«Floral Meteorites from Armenia» ցուցահանդեսը բաց կլինի մինչև դեկտեմբերի 10-ը։

Դեսպանությունը տեղեկացրել է նաև, որ նոյեմբերի 20-ին Աթենքի Ակրոպոլիսի թանգարանում նախատեսվում է բացել «Հնագույն Հայաստան» ցուցահանդեսը, որը կշարունակվի մինչև 2027 թվականի մարտը։

Այն կներկայացնի շուրջ 200 հնագիտական ցուցանմուշ՝ բացահայտելով Հայաստանի մշակութային զարգացումը նախապատմական ժամանակներից մինչև քրիստոնեության սկզբնավորումը՝ մ.թ. 4-րդ դարում։ Ցուցադրությունը կանդրադառնա նաև Հայաստանի պատմական կապերին Մերձավոր Արևելքի, Արևելյան Միջերկրականի, Կիպրոսի, Կրետեի, Հռոդոսի և Սամոսի հետ։