2 րոպեի ընթերցում
Ֆրանսիայի նախագահ Էմանուել Մակրոնը ժամանել է Սաուդյան Արաբիա՝ Պարսից ծոցի երկրներ կատարած իր շրջագայության ընթացքում անակնկալ կանգառ կատարելով Էր Ռիադում։ «Արմենպրես»-ի փոխանցմամբ՝ այս մասին հաղորդում է Al Jazeera-ն։
Մակրոնն առաջին արևմտյան պետության ղեկավարն է, որն այցելում է թագավորություն Եմենի հութիների կողմից իրականացվող հարձակումների ֆոնին։
Էր Ռիադ մեկնելուց առաջ Մակրոնը Դոհայում Կատարի էմիր Թամիմ բին Համադ ալ Թանիի հետ քննարկել է տարածաշրջանային զարգացումները և երկու երկրի միջև ռազմավարական գործընկերությունն ամրապնդելու ուղիները։ Ըստ Կատարի QNA լրատվական գործակալության՝ քննարկվել են նաև տնտեսության, ներդրումների, անվտանգության, պաշտպանության և այլ ոլորտներում կապերն ընդլայնելու միջոցները։
Մինչ այդ Մակրոնն այցելել էր Քուվեյթ, Արաբական Միացյալ Էմիրություններ և Բահրեյն։ Նրա այցի ծրագրում Սաուդյան Արաբիան ներառված չէր։
Պարսից ծոցի երկրներում շրջագայության ընթացքում Ֆրանսիայի նախագահը փորձել է զարգացնել ռազմավարական գործընկերությունները։ Նա նշել է, որ գործընկերներից ստացել է էներգակիրների լրացուցիչ մատակարարումներ ապահովելու հանձնառություններ։