Ամիսներ շարունակվող անտառային հրդեհները Հարավարևելյան Ասիայում օդի աղտոտվածության ճգնաժամ են առաջացրել
2 րոպեի ընթերցում
Տևական ժամանակ չընդհատվող անտառային հրդեհներից առաջացած ծխային քողը տարածվել է Մալայզիայում, Ֆիլիպիններում և Արևելյան Թիմորում՝ մտահոգություններ առաջացնելով Հարավարևելյան Ասիայի տարածաշրջանում օդի որակի առթիվ։ Այդ մասին տեղեկացնում է «Արմենպրես»-ը՝ վկայակոչելով Euronews-ը։
Ինդոնեզիայում անտառային հրդեհներից բարձրացող խիտ ծուխը Պալանկարայի երկինքը ներկել է դեղին երանգով՝ տեսանելիությունը նվազեցնելով մինչև մի քանի տասնյակ մետր։ Երկնքից արված կադրերում երևում է, թե ինչպես է Կենտրոնական Կալիմանտան նահանգի կենտրոնը գրեթե անհետանում ծխի մեջ։
Հարյուրավոր կիլոմետրեր հեռու՝ Սինգապուրը նույնպես հայտնվել էր ծխի մեջ։ Լուսանկարներում ճանապարհները, կամուրջներն ու անցնող տրանսպորտային միջոցները կորել են խիտ ծխի ամպերի մեջ։ Այդ աղտոտվածությունը կապված է արդեն մի քանի ամիս մոլեգնող հրդեհների հետ, որոնք ծխի հսկայական ամպեր են բարձրացնում՝ տարածելով դրանք տարածաշրջանի երկրների սահմաններից շատ հեռու։
Արևելյան Թիմորում իշխանությունները հրամայել են երեք օրով փակել դպրոցները՝ շնչահեղձության վտանգի պատճառով։ Պալանկարայում և Սինգապուրում արձանագրված իրավիճակը վառ կերպով ցույց է տալիս տարածաշրջանային աղտոտման ճգնաժամի մասշտաբները, որը շարունակում է ազդել մարդկանց առօրյա կենսագործունեության վրա։