ԱՄՆ պետքարտուղարությունը հայտարարել է Մեծ Բրիտանիայում ամերիկյան օբյեկտների համար մեծ ռիսկի առկայության մասին

ԱՄՆ Պետքարտուղարությունը նախազգուշացրել է Մեծ  Բրիտանիայի տարածքում ամերիկյան օբյեկտների համար մեծ ռիսկի մասին՝ ԱՄՆ ռազմաօդային ուժերի կողմից օգտագործվող RAF Fairford ավիաբազայի շրջակայքում հինգ անձի ձերբակալումից հետո։

«ԱՄՆ-ի հետ կապված օբյեկտները, հավաքները և կազմակերպությունները կարող են ենթարկվել մեծ ռիսկի։ ԱՄՆ քաղաքացիներին խորհուրդ է տրվում հետևել տեղական իշխանությունների ցուցումներին՝ անձնական անվտանգության ապահովման համար», - «Արմենպրես»-ի փոխանցմամբ, ասված է Պետքարտուղարության  հայտարարության մեջ։

Գերատեսչությունը Մեծ Բրիտանիայում ամերիկացի քաղաքացիներին կոչ է արել զգուշություն ցուցաբերել։

Բրիտանական ոստիկանությունը սեպտեմբերի 27-ին հինգ տղամարդու է ձերբակալել ԱՄՆ-ի կողմից Իրանի դեմ հարվածներ հասցնելու նպատակով օգտագործված ավիաբազայի մոտ պայթուցիկ նյութերի և ահաբեկչության հետ կապված հանցագործությունների կասկածանքով։

ԱՄՆ նախագահ Դոնալդ Թրամփը հայտարարել է, որ կասկածյալները պատրաստվում էին «մեծ վնաս» հասցնել և գտնվել են բրիտանական ու ամերիկյան իշխանությունների ուշադրության կենտրոնում։