Ատրճանակներ, դանակներ, կռփազենք և թմրանյութ․ ՆԳՆ ոստիկանությունը հերթական ուժեղացված ծառայությունն է իրականացրել

Ներքին գործերի նախարարության ոստիկանության ծառայողներն ուժեղացված ծառայություն են իրականացրել Լոռու, Կոտայքի և Արմավիրի մարզերում, Երևանի Էրեբունի վարչական շրջանում ու Մետրոպոլիտենի կայարաններում։

«Արմենպրես»-ի փոխանցմամբ՝ այդ մասին հաղորդագրություն է տարածել ՀՀ ՆԳՆ ոստիկանությունը։

Ոստիկանները շրջայցեր և ստուգողական միջոցառումներ են իրականացրել բակային տարածքներում, հավաքատեղիներում և հանրային այլ վայրերում։

Թմրամիջոց պահելու և օգտագործելու կասկածանքով մի խումբ անձինք տեղափոխվել են Համայնքային ոստիկանության տարածքային բաժիններ։

Ուժեղացված ծառայության արդյունքում հայտնաբերվել են մարտական, մեկնարկային և գազային ատրճանակներ, դանակներ, կռփազենք, թմրամիջոցի զանգվածով փաթեթներ։ Հայտնաբերվել են նաև առանց վարորդական իրավունքի վկայականի տրանսպորտային միջոց վարելու և ճանապարհային երթևեկության այլ կանոններ խախտած վարորդներ։

Հանրային անվտանգության ապահովման, հանցավորության կանխարգելման և իրավախախտումների բացահայտման նպատակով ուժեղացված ծառայությունները շարունակվում են։