Յուանգուդույ. պայքարող գյուղից մինչև խաղաղ լեռնային հանգստավայր

1978-2020 թվականներին Չինաստանում իրականացված աղքատության հաղթահարման արշավի արդյունքում, արագ տնտեսական աճի, լայնածավալ ենթակառուցվածքային ներդրումների և աղքատության կրճատման ազգային ռազմավարությունների շնորհիվ շուրջ 800 միլիոն մարդ դուրս է եկել աղքատությունից։

Չինաստանի նախագահ Սի Ծինփինի նախաձեռնած «Աղքատության թիրախային հաղթահարման» ռազմավարության շրջանակում միայն 2012-2020 թվականներին աղքատությունից դուրս է բերվել գրեթե 100 միլիոն մարդ։

Այս քաղաքականությունը նախատեսում էր աղքատության հաղթահարման ավելի անհատականացված մոտեցում։

Չինաստանի Գանսու նահանգի Դինսի քաղաքի Վեյյուան գավառում գտնվող Յուանգուդույ գյուղը համարվում է երկրի աղքատության հաղթահարման ամենացուցադրական օրինակներից մեկը։ Հատկանշական է, որ Գանսուն, չնայած իր բազմազան աշխարհագրությանը, բնական պաշարներին և արդյունաբերական ներուժին, Չինաստանի տնտեսապես ամենաթույլ զարգացած նահանգներից մեկն է, ինչը հիմնականում պայմանավորված է խիստ կլիմայական պայմաններով և մի շարք այլ գործոններով։

Ընդամենը տասը տարվա ընթացքում երբեմնի աղքատ գյուղական համայնք Յուանգուդույը կտրուկ վերափոխվել է։

Շուշանների և ավանդական չինական բուժիչ բույսերի մշակությունից մինչև «խելացի» ջերմոցների և սերմացու կարտոֆիլի բուծման բազաների ստեղծում․ գյուղի բնակիչները զգալիորեն բարելավել են իրենց կենսամակարդակը՝ միաժամանակ ձևավորելով խաղաղ ու բարեկեցիկ լեռնային համայնք։

Նահանգի մայրաքաղաք Լանչժոուից ավելի քան երկու ժամվա ճանապարհին գտնվող Յուանգուդույը տեղակայված է ծովի մակարդակից մոտ 2500 մետր բարձրության վրա։

Ընդամենը մեկ տասնամյակ առաջ գյուղում գրեթե որևէ ենթակառուցվածք գոյություն չի ունեցել։ 2013 թվականին գյուղ կատարած այցի ընթացքում նախագահ Սի Ծինփինը տեղական իշխանություններին հանձնարարել է բարելավել բնակիչների կենսապայմանները։ Այսօր գյուղն ունի ասֆալտապատ ճանապարհներ, հուսալի էլեկտրամատակարարում և ջրամատակարարում, բուժկետ, զբոսաշրջային հյուրանոց և մանկական խաղահրապարակ։ Երբեմնի աղքատ լեռնային բնակավայրը վերածվել է զբոսաշրջային ուղղության՝ գրավելով այցելուներին իր բնական գեղեցկությամբ։

«Եկե՛ք միասին աշխատենք՝ մեր կյանքն ավելի ու ավելի բարեկեցիկ դարձնելու համար»,-համայնք կատարած այցի ընթացքում ասել է Սի Ծինփինը։

Գյուղի բնակիչները մինչ օրս հպարտությամբ են հիշում երկրի նախագահի այցը։

Տեղական թանգարանում ցուցադրված են լուսանկարներ, որոնցում Չինաստանի նախագահը հանդիպում է գյուղացիների հետ։ Դրանցից մեկում տարեց բնակիչը նրան ջուր է հյուրասիրում պլաստիկ ամանով, ինչը հիշեցում է այն ժամանակվա դժվար կենսապայմանների մասին, երբ գյուղում բացակայում էին նույնիսկ հիմնական ծառայությունները։ Պահպանվել է նաև այդ բնակչի նախկին տունը, որպեսզի երիտասարդ սերունդները պատկերացում կազմեն, թե ինչպիսին էր կյանքը մինչև կառավարության կողմից իրականացված աղքատության հաղթահարման ծրագիրը։

Գյուղի պաշտոնյան «Արմենպրես»-ին հայտնել է, որ Յուանգուդույի արդիականացման համար կառավարությունը ներդրել է ընդհանուր առմամբ 240 միլիոն յուան, որը համարժեք է շուրջ 35,5 միլիոն ԱՄՆ դոլարի։

«Աղքատության հաղթահարման վերջնական նպատակը մարդկանց կենսամակարդակի բարձրացումն է»,-նշել է պաշտոնյան՝ ընդգծելով նախագահ Սի Ծինփինի վարած քաղաքականությունը։

Տարեց գյուղացիներից մեկը, որն իր ապրուստը վաստակում է ավանդական չինական բուժիչ բույսերի մշակությամբ, նշել է, որ Սի Ծինփինի այցը շրջադարձային պահ է եղել համայնքի համար։

«Մեծ փոփոխություններ տեղի ունեցան այն բանից հետո, երբ նախագահ Սի Ծինփինն այցելեց մեզ։ Ես շատ երջանիկ եմ։ Իմ կյանքը փոխվել է»,-ասել է նա «Արմենպրես»-ին։

«Աղքատության հաղթահարման ծրագրի» մեկնարկից առաջ գյուղի մեկ շնչին բաժին ընկնող միջին տարեկան եկամուտը կազմում էր ընդամենը 1000 յուան, այսինքն՝ փոքր-ինչ ավելի քան 100 ԱՄՆ դոլարը։ Այսօր այդ ցուցանիշը գերազանցում է 21 500 յուանը։

Այնուհետև գյուղը ստացել է «Աղքատության հաղթահարման ազգային ցուցադրական գյուղ» կարգավիճակ։

Յուանգուդույում ձևավորվել է արդյունաբերական զարգացման մոդել, որը հիմնված է «առաջատար ձեռնարկություններ + կոոպերատիվներ + արտադրական բազաներ + խոշոր արտադրողներ» սկզբունքի վրա։ Այս մոդելի շրջանակում շուշանների մշակության տարածքը հասել է 1470 մուի (մուն չինական չափման միավոր է, որը հավասար է մոտ 666 քմ-ի), իսկ ավանդական չինական բուժիչ բույսերի մշակությունը՝ գրեթե 2000 մուի։ Գյուղում ստեղծվել է նաև ավանդական չինական դեղաբույսերի ստանդարտացված վերամշակման ձեռնարկություն և սերմացու կարտոֆիլի արտադրության բազա։ Վերամշակման ձեռնարկությունը տարեկան մշակում է մոտ 1500 տոննա բուժիչ հումք և ապահովում կայուն զբաղվածություն ավելի քան 100 տեղացի բնակչի համար։

Բացի այդ, Յուանգուդույում ներդրվել է զարգացման մոդել, որը միավորում է Գյուղի կոլեկտիվ տնտեսական կոոպերատիվն ու գյուղական բիզնես գործընկերներին՝ խրախուսելով գյուղից սերած 46 ձեռնարկատերերի վերադառնալ և ներդրումներ կատարել իրենց հայրենի համայնքում։ Կոլեկտիվ տնտեսական եկամուտների հինգ նոր աղբյուրների ստեղծման շնորհիվ աճել են ինչպես համայնքի ընդհանուր եկամուտներն, այնպես էլ տնային տնտեսությունների եկամուտները։

Յուանգուդույը վառ մարմնավորումն է նրա, թե ինչպես կարող են շարունակական ներդրումները, նպատակային պետական քաղաքականությունը և տեղական արդյունաբերության զարգացումը արմատապես փոխել Չինաստանի նախկինում աղքատ գյուղական համայնքներից մեկի բնակիչների կենսապայմանները։

Գյուղի աշխարհագրական դիրքը նպաստել է նաև զբոսաշրջության զարգացմանը։ Յուանգուդույի հարևանությամբ գտնվում է Մացզյայաո գյուղը, որը Մացզյայաո մշակույթի բնօրրանն է։ Այն Չինաստանի նեոլիթյան ժամանակաշրջանի ամենանշանակալի մշակույթներից մեկն է և առավել հայտնի է իր յուրահատուկ գունազարդ խեցեղենով։