2 րոպեի ընթերցում
ՖԻԲԱ Եվրոպայի նախագահ Խորխե Գարբախոսան և գործադիր տնօրեն Կամիլ Նովակը պաշտոնական շնորհավորական նամակ են հղել Հայաստանի բասկետբոլի ֆեդերացիային՝ Եվրոպայի մինչև 16 տարեկանների C դիվիզիոնում Հայաստանի Մ16 հավաքականի չեմպիոնության առթիվ:
«Արմենպրես»-ի փոխանցմամբ՝ այս մասին հաղորդագրություն է տարածել Հայաստանի բասկետբոլի ֆեդերացիան։
Նամակում մասնավորապես ասված է.
«Այս փայլուն արդյունքը ձեր երիտասարդ մարզիկների և մարզչական շտաբի կատարած քրտնաջան աշխատանքի, նվիրումի և տաղանդի արտացոլումն է։ Չեմպիոնի կոչումը նվաճելը նշանակալի ձեռքբերում է հայկական բասկետբոլի համար և ապագայի խոստումնալից ազդակ։
Խնդրում ենք մեր ջերմ շնորհավորանքները փոխանցել խաղացողներին, մարզիչներին և պատվիրակության բոլոր անդամներին։ Մաղթում ենք ձեզ շարունակական հաջողություններ, նոր նվաճումներ և կայուն զարգացում առաջիկա տարիներին»։
Հիշեցնենք, որ Եվրոպայի մինչև 16 տարեկանների C դիվիզիոնի առաջնությունն անցկացվեց Երևանում։ Հայաստանի հավաքականը մրցաշարն ավարտեց անպարտելի՝ հաղթելով բոլոր 6 հանդիպումներում։ Եզրափակչում Հայաստանի ընտրանին 97:68 հաշվով առավելության հասավ Մալթայի հավաքականի նկատմամբ և նվաճեց Եվրոպայի C դիվիզիոնի չեմպիոնի տիտղոսը։
Մրցաշարի խորհրդանշական հնգյակում ընդգրկվեցին Հայաստանի հավաքականի երկու բասկետբոլիստներ՝ Էնթոնի Սարգսյանն ու Էթան Կազանչյանը, իսկ Էնթոնի Սարգսյանը ճանաչվեց նաև մրցաշարի ամենաարժեքավոր խաղացողը (MVP):