Թալիբներն արգելել են իրենց խմբավորման անդամներին և պետական ծառայողներին սմարթֆոններ օգտագործել
2 րոպեի ընթերցում
Թալիբների առաջնորդ Հայբաթուլլահ Ախունդզադան բանավոր հրաման է արձակել՝ արգելելով խմբավորման անդամներին և պետական ծառայողներին գործածել սմարթֆոններ: «Արմենպրես»-ի փոխանցմամբ՝ այս մասին հաղորդում է KabulNow-ն։
Տեղեկություններ են հաղորդվում, որ հրամանը խախտող անձինք կհամարվեն «հանցագործներ» և կուղարկվեն ռազմական դատարաններ։
«Թալիբան»-ի առաջնորդը հրամանը տվել է երկրի ութ գոտիներում գտնվող ռազմական դատարանների ղեկավարների, ոստիկանության պետերի և հետախուզության ղեկավարների հետ հանդիպման ժամանակ։
Հրահանգում նշվել է, որ ութ գոտիներում գտնվող «Թալիբան»-ի ռազմական դատարանների ղեկավարները պատասխանատու են հրամանը կատարելու համար անհրաժեշտ միջոցներ ձեռնարկելու և դրա կատարման մասին Հայբաթուլլահ Ախունդզադայի գրասենյակին զեկուցելու համար։
Ստեղծվել է նաև հատուկ մոնիթորինգի ցուցակ, որում գրանցվում են հսկողության ենթարկվող յուրաքանչյուր անձի անունը, պաշտոնը, ծառայության վայրը, բջջային օպերատորը և հեռախոսահամարը։
KabulNow-ի հաղորդմամբ՝ հրամանի հրապարակումից հետո տարածվել է տեսանյութ, որում երևում է, թե ինչպես է շարժման անդամը ոչնչացնում իր սմարթֆոնը։
Տեղեկություններ են հաղորդվում նաև այն մասին, որ վերջին օրերին իսլամական կրթության վարչությունն արգելել է ուսանողներին սմարթֆոններ տանել դպրոցներ կամ հոգևոր ճեմարաններ:
Թալիբների բարձրագույն կրթության նախարարը նախկինում սմարթֆոններն անվանել է «մուսուլմանների երեք հիմնական թշնամիներից մեկը»: