Հայաստանի ինստիտուցիոնալ համակարգը բավարար չափով կայացած են՝ կանխելու ցանկացած հեղաշրջման փորձ. վարչապետ

Հայաստանի իրավապահ և ինստիտուցիոնալ համակարգերը բավարար չափով կայացած են՝ կանխելու ցանկացած հեղաշրջման փորձ։ «Արմենպրես»-ի հաղորդմամբ՝ լրագրողների հետ ճեպազրույցում այս մասին հայտարարել է վարչապետ Նիկոլ Փաշինյանը՝ անդրադառնալով ՀՀ երկրորդ նախագահ Ռոբերտ Քոչարյանի հայտարարությանը, թե եթե իրենից հաղթանակը «գողանան», ինքը պատրաստ է գնալ հեղափոխության։

«Հայաստանի իրավապահ և ինստիտուցիոնալ համակարգը բավարար չափով կայացած է, որպեսզի բնում խեղդի ցանկացած հեղաշրջման փորձ»,- ասել է վարչապետը։

Փաշինյանը նաև հայտարարել է, որ անիմաստ է մեկնաբանել Քոչարյանի՝ ընտրություններում հաղթելու վերաբերյալ պատկերացումները։

«Եթե Ռոբերտ Քոչարյանն այնքան է իր իրականության զգացումը կորցրել, որ մտածում է՝ ինքը Հայաստանի Հանրապետության խորհրդարանական ընտրություններում կարող է հաղթել, ես դրա վերաբերյալ անիմաստ եմ համարում որևէ մեկնաբանություն անել։ Մնում է միայն կարեկցել այդ մարդուն»,- նշել է նա։

Հունիսի 7-ին Հայաստանում կանցկացվեն խորհրդարանական ընտրություններ։ Ընթանում է նախընտրական քարոզարշավը։ Մասնակցում են 18 ուժեր՝ երկու դաշինք և 16 կուսակցություն (ի սկզբանե գրանցված ուժերից մեկը՝ «Ալյանս» կուսակցությունը, դուրս է եկել ընտրապայքարից)։

ՀՀ վարչապետ Նիկոլ Փաշինյանը գլխավորում է «Քաղաքացիական պայմանագիր» կուսակցության ցուցակը, իսկ երկրորդ նախագահ Ռոբերտ Քոչարյանը՝ «Հայաստան» դաշինքի, որի կազմում են ՀՅԴ-ն և «ԱռԱջ» կուսակցությունը։