Այստեղ եմ՝ առաջ տանելու ԱՄՆ նախագահի և ՀՀ վարչապետի ապագայի տեսլականը. Մարկո Ռուբիոն՝ Երևանում
2 րոպեի ընթերցում
Ամերիկայի Միացյալ Նահանգների պետքարտուղար Մարկո Ռուբիոն խիզախ ճանապարհ է համարում Հարավայի Կովկասում խաղաղությանն ուղղված Հայաստանի ջանքերը, որին աջակցում է նաև Միացյալ Նահանգները:
«Արմենպրես»-ի փոխանցմամբ՝ այս մասին Ռուբիոն հայտարարեց Հայաստան կատարած այցի ընթացքում:
«Ուրախ եմ, որ այսօր այստեղ եմ, որպեսզի շարունակեմ առաջ տանել նախագահ Թրամփի և վարչապետի (խմբ․ նկատի ունի ՀՀ վարչապետ Նիկոլ Փաշինյանին) ապագայի տեսլականը: Սա խիզախ ճանապարհ է, խիզախ ճանապարհ դեպի խաղաղություն Հարավային Կովկասում, որը հաստատվել է անցյալ տարվա օգոստոսի 8-ին, Վաշինգտոնում։ Ինձ համար պատիվ էր այսօր այստեղ միանալ արտաքին գործերի նախարարին (խմբ. նկատի ունի Հայաստանի արտաքին գործերի նախարար Արարատ Միրզոյանին)՝ ստորագրելու այս երկկողմ համաձայնագիրը՝ Միջազգային խաղաղություն և բարգավաճում տանող երթուղու կամ, ինչպես նրան անվանում են՝ TRIPP-ի մասին: Այս համաձայնագիրը նշանավորում է այս պատմական ուղին Հայաստանում կյանքի կոչելու և, անկեղծ ասած, ողջ տարածաշրջանում խաղաղությունն առաջ մղելու և բարեկեցությունը բարձրացնելու մեր այսօրվա ամենամեծ քայլը»,- նշեց Ռուբիոն:
Հայաստանի Հանրապետության արտաքին գործերի նախարար Արարատ Միրզոյանն ու Ամերիկայի Միացյալ Նահանգների պետքարտուղար Մարկո Ռուբիոն նախաստորագրել են «Թրամփի ուղի՝ հանուն միջազգային խաղաղության և միջազգային բարգավաճման» նախագծի վերաբերյալ ռազմավարական համագործակցության մասին շրջանակային համաձայնագիրը։