Որևէ պետության հաշվին մյուսի հետ հարաբերություն չի զարգացվում․ Փոխնախարարը՝ պաշտպանության ոլորտի դիվերսիֆիկացիայի մասին
1 րոպեի ընթերցում
Հայաստանի Հանրապետությունը պաշտպանության ոլորտի դիվերսիֆիկացիան չի իրականացնում որևէ պետության հաշվին մյուսի հետ հարաբերություններ զարգացնելով։ «Արմենպրես»-ի փոխանցմամբ՝ այս մասին լրագրողների հետ զրույցում հայտարարեց Պաշտպանության նախարարի տեղակալ Արման Սարգսյանը։
«Մենք չպետք է պարփակված, մենք մեր խնդիրներով պարուրված մնանք։ Այդ առումով, որքան շատ պետությունների հետ համագործակցենք, այդ թվում՝ Եվրոպական, աշխարհի այն երկրների, որոնք ցանկանում են, որ ՀՀ-ում տիրի խաղաղություն և դա իրականացնում են ի նպաստ մեր պաշտպանական կարողությունների զարգացման, մենք պետք է իրենց հետ մեր հարաբերություններն ավելի զարգացնենք։ Որևէ պետության հաշվին որևէ պետության հետ հարաբերություն չի զարգացվում»,- նշեց Սարգսյանը։
Անդրադառնալով Հնդկաստանի հետ պաշտպանության ոլորտում համագործակցությանը, Սարգսյանն այն որակեց հրաշալի, նշելով, որ դա ևս իրականացվում է Հայաստանի պաշտպանական կարողությունները բարելավելու նպատակով։