Ոստիկանությունը որոնում է Աթենքի պետական հաստատություններում կրակ բացած տղամարդուն

Աթենքի կենտրոնում զինված տղամարդը կրակ է բացել երկու տարբեր վայրերում, որի հետևանքով 5 մարդ է տուժել։ «Արմենպրես»-ի փոխանցմամբ՝ այս մասին հաղորդում է Sky News-ը։

Նշվում է, որ ոստիկանությունը դեռ որոնում է կասկածյալին։

89-ամյա տղամարդը որսորդական հրացանից կրակ է բացել նախ Աթենքի կենտրոնում գտնվող սոցիալական ապահովության միասնական հիմնադրամում՝ ոտքից վիրավորելով աշխատակիցներից մեկին։

Այնուհետև նա կրակ է բացել Աթենքի վերաքննիչ դատարանում՝ վիրավորելով ևս չորս հոգու։

Տուժածների կյանքին վտանգ չի սպառնում։

Դատարանում կրակ բացելուց առաջ հարձակվողը հատակին նետել է ինչ-որ գրություն պարունակող ծրար։ Ավելի ուշ նա զենքը թողել է դատարանի շենքի մոտ և թաքնվել։

Նրա գործողությունների դրդապատճառների մասին չի հաղորդվում։