Բերդ խոշորացված համայնքի Չինչին բնակավայրի համար կրթահամալիր կկառուցվի. Նիկոլ Փաշինյանը շփվել է բնակիչների հետ
1 րոպեի ընթերցում
Հայաստանի Հանրապետության վարչապետ Նիկոլ Փաշինյանն այցելել է Տավուշի մարզ, որտեղ ծանոթացել է Բերդ խոշորացված համայնքի Չինչին բնակավայրի ասֆալտապատված ճանապարհին:
‹‹Արմենպրես››-ի հաղորդմամբ՝ այս մասին վարչապետ Փաշինյանը տեսանյութ է հրապարակել ‹‹Ֆեյսբուք››-ի իր էջում:
Վարչապետն իր այցի ընթացքում կանգառ է կատարել Չինչին գյուղում՝ շփվելով բնակիչների հետ և շնորհավորելով նրանց նոր ճանապարհ ունենալու առթիվ:
Բնակիչներն, իրենց հերթին, շնորհակալություն են հայտնել վարչապետ Փաշինյանին ճանապարհը հիմնանորոգելու համար:
Նիկոլ Փաշինյանը հայտարարել է, որ բնակավայրի համար նոր կրթահամալիր է կառուցվելու:
Երկրի ղեկավարը գյուղացիների հետ զրույցի ընթացքում ուշադրություն է հրավիրել այն հանգամանքի վրա, որ բնակավայրի բնությունը շատ գեղեցիկ է, ինչը, նոր ճանապարհի առկայությամբ, հնարավորություն է ընձեռում ակտիվացնել նաև զբոսաշրջային ոլորտը:
Վարչապետը բնակիչներին խնդրել և հորդորել է խնամքով վերաբերվել ճանապարհին: