368.53
2 րոպեի ընթերցում
Պետական և մասնավոր հատվածների միջև արդյունավետ համագործակցության շրջանակներում Հայ-Բրիտանական առևտրի պալատը ապրիլի 21-ին Երևանում անցկացրեց Հանրային-մասնավոր երկխոսության հարթակի նիստը՝ համախմբելով Պալատի անդամ ընկերություններին, Հայաստանում Միացյալ Թագավորության դեսպանության և Հայաստանի ֆինանսների նախարարության ներկայացուցիչներին։
«Մեր նպատակն է ստեղծել կայուն և արդյունավետ հարթակ՝ ապահովելու բաց, թափանցիկ և կառուցողական հաղորդակցություն պետական և մասնավոր հատվածների միջև։ Մենք վստահ ենք, որ նման շարունակական երկխոսության միջոցով հնարավոր է ձևավորել առավել կանխատեսելի, վստահելի և բիզնեսի զարգացմանը նպաստող միջավայր Հայաստանում»։
Հայ-Բրիտանական առևտրի պալատի խորհրդի նախագահ Արամ Փինաջյանի խոսքով՝ մասնավոր-հանրային հարթակի շրջանակներում հնարավորություն է ստեղծվում քննարկելու արդիական խնդիրներ։
«Այս հարթակի իմաստն այն է, որ մենք կարողանանք ներկայացնել մեր խնդիրները և լսել պետական մարմիններից, թե ինչպիսի փոփոխություններ են կանխատեսվում, որպեսզի ստանանք ավելի պարզ և ավելի հասկանալի գործարար միջավայր»,-ասաց Փինաջյանը։
Հայաստանում Միացյալ Թագավորության փոխդեսպան Փոլ Մորիսը երկխոսությունը կառուցողական համարեց։
«Նման պլատֆորմը մեծ նշանակություն ունի երկու երկրների տնտեսական զարգացման գործում։ Ես շատ ուրախ եմ մասնակցելու այս բաց երկխոսությանը»,-ասաց փոխդեսպանը։
ՀՀ ֆինանսների նախարարի տեղակալներ Ավագ Ավանեսյանը և Արման Պողոսյանը ներկայացրեցին նախարարության կողմից իրականացվող քաղաքականության հիմնական ուղղությունները և ընթացիկ բարեփոխումները։ Նրանք կարևորեցին պետական և մասնավոր հատվածների միջև արդյունավետ համագործակցության դերը՝ տնտեսական միջավայրի շարունակական բարելավման գործում: