Հայաստանում ոսկեգործության և ադամանդագործության համար հարկային նպաստավոր պայմաններ են ստեղծվում
2 րոպեի ընթերցում
Հայաստանի հարկային օրենսգրքում փոփոխություններ և լրացումներ նախատեսող նախագծով նախատեսվում է տնտեսության վերամշակող երկու կարևոր ճյուղերի՝ ոսկեգործության և ադամանդագործության համար նպաստավոր հարկային միջավայրի ձևավորել։
«Արմենպրես»-ի հաղորդմամբ՝ օրենքի նախագիծն առաջին ընթերցմամբ Ազգային ժողովի քննարկմանը ներկայացրեց Ֆինանսների նախարարի տեղակալ Արման Պողոսյանը։
Նրա խոսքով՝ նախագծով, ըստ էության, համակարգային բարելավում է այդ ճյուղերի հարկային միջավայրը, որովհետև առաջարկվում է ԱԱՀ-ով հարկման արտոնյալ՝ մնացած ոլորտներից տարբերվող կարգավորումներ։
Օրենքի ընդունումից հետո ոսկու և թանկարժեք քարերի արտադրողների համար ԱԱՀ-ի բազան կամ հարկը կհաշվարկվի ոչ թե արտադրողի կողմից նշանակված գնից ամբողջությամբ, այլ այդ գնի և տվյալ զարդի արտադրության համար օգտագործված ոսկու զանգվածի ու թանկարժեք քարերի փաստաթղթավորված ծախսերի տարբերության չափով։
«Այսինքն՝ այն նոր արժեքի չափով, որը նոր ստեղծվել է տվյալ արտադրողի մոտ՝ նվազեցնելով ոսկու և թանկարժեք քարերի գները։ Մոտավորապես նույն տրամաբանությամբ վերավաճառողին հնարավորություն է տրվում, որպեսզի ոչ թե վաճառքի ամբողջ գնից հաշվարկի ԱԱՀ-ն, այլ վաճառքի և արտադրողին վճարած գների տարբերությունով՝ կրկին այն տրամաբանությամբ, որ վերավաճառողի մոտ միայն իր առևտրային վերադիրն է»,-ներկայացրեց փոխնախարարը՝ հավելելով, որ հարկային հաշվառումն ու վարչարարությունը պարզեցնելու, ինչպես նաև կանխատեսելի կանոն ունենալու համար արտադրողի դեպքում նախատեսվում է սահմանել, որ, այդուհանդերձ, եթե այս եղանակով հաշվարկվող հարկման բազան ընդհանուր գնի 10 տոկոսից պակաս ստացվի, ապա հարկման նպատակով հիմք է ընդունվելու առնվազն գնի 10 տոկոսը։