Խաղաղություն բառը կանխորոշեց 2021 թվականին հաջորդած մեր քաղաքականությունները. Նիկոլ Փաշինյան
2 րոպեի ընթերցում
Հայաստանի Հանրապետության վարչապետ, ՔՊ կուսակցության վարչության նախագահ Նիկոլ Փաշինյանի համոզմամբ՝ առաջին անգամ ՀՀ ժողովուրդը դարձավ քաղաքականությունների ու ռազմավարությունների հեղինակ՝ 2021 թվականից։
«Արմենպրես»-ի հաղորդմամբ՝ ՀՀ վարչապետն այդ մասին հայտնեց «Քաղաքացիական պայմանագիր» կուսակցության 8-րդ արտահերթ համագումարում։
«Նախկինում ժողովրդին ոչ ոք չի ցանկացել լսել, որովհետև համարել են, որ ժողովուրդը բավարար չափով «աշխարհ տեսած չէ»։ Այդ երևույթի շարունակությունն է այն, որ քաղաքական պրոցեսին մասնակցող ներկայիս որոշ ուժեր ժողովրդի հասցեին ինչ ասես ասում են, իսկ հետո մասնակցում ընտրությունների։ Բայց դա քաղաքական տգիտության գագաթնակետն է։ Ինձ համար ակնհայտ է, որ 2026 թվականի հունիսի 7-ի ընտրություններում էլ պատերազմի եռագլուխ կուսակցությունը հագնելու է ժողովրդի պատին»,- ասաց Փաշինյանը։
Նրա դիտարկմամբ՝ Կառավարության 2021 թվականի ծրագիրը բացառիկ էր այն առումով, որ ցույց էր տալիս պատմական շրջափուլերի և պատմական պրոցեսների բախումը։
«Դրանցից մեկը ժողովրդի ներքին մղումների, մյուսը՝ աշխարհաքաղաքական թակարդի կողմից մեզ վերապահված պատմական դերակատարման բախումն էր, ինչի առթիվ այսօր էլ հարկ եմ համարում հիշատակել իմ և երջանկահիշատակ Ֆրանցիսկոս Պապի երկխոսությունը, որը տեղի ունեցավ 2024 թվականի նոյեմբերին՝ Վատիկան կատարած իմ այցի ընթացքում։ Պապն ասաց, որ մեզ ճանաչում է որպես նահատակ ժողովուրդ։ Բայց ես ասացի, որ իմ և մեր Կառավարության առաքելությունն այն է, որ այլևս չլինենք նահատակ ժողովուրդ և փոխենք մեր պատմական ճակատագիրը։ Մենք պարզապես ապրելու ենք և պետություն ենք ստեղծելու։ Եվ հենց այստեղ է, որ ՔՊ-ն ունի պատմական առաքելություն՝ ՀՀ ժողովրդին առաջնորդել դեպի սովորական, բարեկեցիկ, ազատ, ինքնիշխան, պետականակենտրոն կյանք»,- ասաց Փաշինյանը։