366.85
ՀՀ ԱԱԾ սահմանապահ զորքերում տեղի է ունեցել նորակոչիկ զինծառայողների երդման արարողություն
2 րոպեի ընթերցում
ՀՀ ազգային անվտանգության ծառայության սահմանապահ զորքերի N զորամասում ՀՀ օրհներգի հնչյունների ներքո կայացել է նորակոչիկների երդման հանդիսավոր արարողությունը։ Այդ մասին տեղեկացնում է «Արմենպրես»-ը՝ վկայակոչելով ՀՀ Ազգային անվտանգության ծառայության տարածած հաղորդագրությունը։
Միջոցառմանը ներկա են եղել Հայաստանի Հանրապետության ազգային անվտանգության ծառայության տնօրեն Անդրանիկ Սիմոնյանը, տնօրենի տեղակալներ Արամ Հակոբյանը և Դավիթ Սանամյանը, Սահմանապահ զորքերի հրամանատար, գնդապետ Գարիկ Մուրադյանը և այլ պաշտոնատար անձինք:
Զորամասի շարահրապարակում՝ մարտական դրոշի ներքո, տեղի է ունեցել խորհրդանշական միջոցառման հիմնական արարողակարգային հատվածը՝ երդման հանդիսավոր արարողությունը։
Նորակոչիկ զինծառայողները երդվել են, որ լինելու են Հայաստանի Հանրապետության պետական սահմանի անձեռնմխելության և անառիկության երաշխավորը, միաժամանակ վստահեցնելով, որ արդարացնելու են իրենց հետ կապված բոլոր հույսերն ու սպասումները։
Հիշարժան օրվա կապակցությամբ նորակոչիկներին շնորհավորել է ՀՀ ազգային անվտանգության ծառայության տնօրեն Անդրանիկ Սիմոնյանը, այնուհետև ելույթի խոսքով հանդես է եկել ՀՀ ԱԱԾ սահմանապահ զորքերի հրամանատարը։
Երդման արարողության կապակցությամբ ծնողների անունից նորակոչիկներին շնորհավորել է ծնող Նոնա Հակոբյանը։
Նորակոչիկները կատարել են ՀՀ ԱԱԾ սահմանապահ զորքերի օրհներգը, և երդման հանդիսավոր արարողությունը եզրափակվել է նվագախմբի ուղեկցությամբ՝ նորակոչիկների շարային քայլերթով։
Հանդիսավոր արարողության ավարտին Սահմանապահ զորքերի ժամկետային զինծառայողները ցուցադրել են հատուկ մարտավարական և ձեռնամարտի հնարքներ, իսկ կինոլոգիական կենտրոնը՝ ծառայողական շներով վարժաձևեր։
Այցի ավարտին Ազգային անվտանգության ծառայության տնօրենը շրջայց է կատարել զորամասում, ծանոթացել է զինծառայողների կենցաղային և ծառայողական պայմաններին, սպառազինության և նյութատեխնիկական միջոցներին։
Բաժանորդագրվեք մեր ալիքին Telegram-ում