Աֆղանստանը Պակիստանին մեղադրել է հրադադարի ռեժիմի խախտման համար

Աֆղանստանի բանակի գլխավոր շտաբի պետը հայտարարել է, որ պակիստանցի զինվորականները խախտել են հրադադարի ռեժիմը Դուրանդի գծի երկայնքով՝ երկու պետությունների միջև Քաբուլի կողմից չճանաչված սահմանին։ «Արմենպրես»-ի փոխանցմամբ՝ այս մասին հաղորդել է Աֆղանստանի Ariana News հեռուստաալիքը:

ԳՇ պետ Քարի Ֆասիհուդդին Ֆիթրաթի խոսքով՝ սահմանամերձ շրջաններում Պակիստանի ուժերի հարձակումների հետևանքով զոհվել է մի քանի խաղաղ բնակիչ: Նա նշել է, որ այդ գործողությունները մարտական գործողությունների ժամանակավոր դադարեցման շուրջ համաձայնության պայմաններում «վկայում են Իսլամաբադի կողմից անբավարար հանձնառության և խաբեության մասին»:

Ֆիթրաթն ընդգծել է, որ Քաբուլը նախկինի նման ձեռնպահ է մնում պատասխան միջոցներից՝ իրադրության հետագա սրում թույլ չտալու համար, և պահպանում է հրադադարի ռեժիմը: Դրա հետ մեկտեղ, նրա խոսքով,  եթե նման հարձակումները կրկնվեն, ապա «հրադադարը կկորցնի իմաստը», և Աֆղանստանը Պակիստանին «վճռական հակահարված» կտա:

Մարտի 18-ին Պակիստանը և Աֆղանստանը որոշում են ընդունել դադարեցնել մարտական գործողություններն Էյդ ալ Ֆիտր մուսուլմանական տոնի ժամանակ՝ Սաուդյան Արաբիայի, Կատարի և Թուրքիայի խնդրանքով:

Երկու երկրների միջև մարտերը վերսկսվել են փետրվարի վերջին։ Իսլամաբադը պնդում է, որ Քաբուլն ապաստան է տալիս Պակիստանում հարձակումներ իրականացնող զինյալների։ Աֆղանստանում իշխող «Թալիբան»-ը հերքել է այս մեղադրանքները։