2 րոպեի ընթերցում
Իրանական արկի ընկնելու հետևանքով հրդեհ է բռնկվել Արաբական Միացյալ Էմիրություններում գտնվող Ավստրալիայի ռազմաբազայում։ Ինչպես հաղորդում է «Արմենպրես»-ը՝ վկայակոչելով Associated Press լրատվական գործակալությունը, այս մասին հայտնել է Ավստրալիայի վարչապետ Էնթոնի Ալբանիզը։
«Իրանական արկը հարվածել է բազայի մոտակայքում։ Ես կարող եմ հաստատել, որ ավստրալացի անձնակազմի անդամներից ոչ մեկը չի տուժել, և այս պահին բոլորը լիովին անվտանգ են», - լրագրողներին ասել է Ալբանիզը։
Նա տեղեկացրել է, որ արկի հարվածից փոքր հրդեհ է բռնկվել, ինչից «աննշան վնասվել են բնակելի շենքն ու բժշկական հաստատությունը»։
«Բազա տանող ճանապարհին այդ արկի հարվածի հետևանքով առաջացած փոքր հրդեհի պատճառով բազայի բնակելի և բժշկական հատվածներն աննշան վնասվել են», - հավելել է նա։
Ալբանեզեն չի նշել, թե անձնակազմի քանի անդամ է եղել բազայում այդ պահին կամ արդյոք այնտեղ ներկա են եղել որևէ այլ երկրի քաղաքացիներ։
ԱՄՆ-ն և Իսրայելն Իրանի դեմ համատեղ ռազմական գործողություն են սկսել փետրվարի 28-ից՝ մեղադրելով Թեհրանին հրթիռային և միջուկային ծրագիրը զարգացնելու համար։ Իրանը, հերքելով մեղադրանքները, սկսել է պատասխան հարվածներ հասցնել Իսրայելին, ինչպես նաև տարածաշրջանի երկրներում ամերիկյան ռազմաբազաներին։ Հարվածներից տուժել են Քուվեյթը, Կատարը, ԱՄԷ-ն, Սաուդյան Արաբիան, Օմանը, Բահրեյնը։