Արթուր Վանեցյանի գլխավորած «Հայրենիք» կուսակցությունը չի մասնակցի խորհրդարանական ընտրություններին
2 րոպեի ընթերցում
Արթուր Վանեցյանի գլխավորած «Հայրենիք» կուսակցության գործադիր մարմինը չի մասնակցի 2026 թվականին սպասվող խորհրդարանական ընտրություններին։
«Արմենպրես»-ի փոխանցմամբ՝ կուսակցության տարածած հայտարարության մեջ շեշտվում է, որ որոշումը կայացվել է փետրվարի 26-ի նիստում՝ Հայաստանի ներքաղաքական իրավիճակը, առկա ներքին և արտաքին մարտահրավերները, ինչպես նաև նախընտրական փուլին բնորոշ զարգացումները քննարկելու արդյունքում։
Ընտրություններին չմասնակցելու որոշման պատճառներից նշվում է քաղաքական դաշտի բևեռացված մնալը՝ առանց իրական համախմբող պետական գաղափարախոսության և արժեքային հստակ առանցքի․
««Հայրենիք» կուսակցության գաղափարական հիմքերը, ծրագրային առաջնահերթությունները և Հայաստանի ապագայի վերաբերյալ ռազմավարական պատկերացումները տարբերվում են քաղաքական դաշտում գործող մյուս ուժերի մոտեցումներից, ինչի արդյունքում դաշինքի ձևավորումը դառնում է ոչ իրատեսական։
Ընդդիմադիր դաշտից ընտրությունների մասնակից ուժերի քանակի մեծացումը կարող է առաջացնել ընտրողների քվեների մասնատում և քաղաքական ռեսուրսների բաշխման անարդյունավետություն, ինչը վերոնշյալ պայմաններում կարող է բացասաբար անդրադառնալ սպասվող ընտրական գործընթացների արդյունքների վրա»,– հայտարարում են կուսակցությունից՝ հորդորելով կուսակցության անդամներին, համակիրներին և աջակիցներին առաջիկա խորհրդարանական ընտրություններում իրենց ձայնը տալ իրական ընդդիմադիր ուժերից ցանկացածին՝ ըստ սեփական նախընտրության։
Հայաստանում խորհրդարանական ընտրությունները տեղի կունենան 2026 թվականի հունիսի 7-ին։