1 րոպեի ընթերցում
Հայաստանի ֆուտբոլի ազգային հավաքականի ֆուտբոլիստ Տիգրան Բասեղյանն ավարտում է կարիերան Հայաստանի հավաքականում:
«Արմենպրես»-ի հաղորդմամբ` Տիգրան Բարսեղյանը հանդես է եկել հայտարարությամբ, որը տարածել է Հայաստանի ֆուտբոլի ֆեդերացիան։
«Սիրելի՛ երկրպագուներ, ցանկանում եմ տեղեկացնել, որ որոշել եմ ավարտել իմ կարիերան Հայաստանի ազգային հավաքականում։Ինձ համար մեծ պատիվ ու պատասխանատվություն է եղել տարիներ շարունակ Հայաստանի ազգային հավաքականի մարզաշապիկը կրելը և մեր երկրի գույները պաշտպանելը։Ցանկանում եմ շնորհակալություն հայտնել ազգային հավաքականում ինձ մարզած բոլոր մարզիչներին, թիմակիցներիս, հավաքականի բժշկական և ադմինիստրատիվ անձնակազմին, Հայաստանի ֆուտբոլի ֆեդերացիայի բոլոր աշխատակիցներին և, իհարկե, մեր հավատարիմ երկրպագուներին, ովքեր միշտ եղել են մեր կողքին՝ թե՛ հաղթանակների, թե՛ պարտությունների ժամանակ։Ես շարունակելու եմ աջակցել հավաքականին արդեն նոր՝ երկրպագուի կարգավիճակով։ Մաղթում եմ մեր ազգային հավաքականին հաղթանակներ և մեծ ձեռքբերումներ»,- ասված է հայտարարության մեջ:
Տիգրան Բարսեղյանն իր նորամուտը ազգային թիմում տոնել է 2016 թվականին: Նա հավաքականում անցկացրել է 64 խաղ` դառնալով 9 գոլի հեղինակ: