1 րոպեի ընթերցում
Հայաստանի վարչապետ Նիկոլ Փաշինյանի համոզմամբ՝ ներքաղաքական և հանրային կյանքում խոսույթի առողջացման կարիք կա։ «Արմենպրես»-ի փոխանցմամբ՝ Փաշինյանն այս մասին ասաց լրագրողների հետ ճեպազրույցում։
«Ես էլ ինձ, եղել է, այդ թվում՝ էմոցիաների տակ, թույլ եմ տվել արտահայտություններ, որոնցով չեմ հպարտանում և որոնց համար նաև ներողություն եմ խնդրել։ Կոռուպցիայի կանխարգելման հանձնաժողովն էլ իմ դեմ վարույթ է հարուցել և որոշում է կայացրել, որ մեղավոր եմ»,- ասաց վարչապետը։
Նիկոլ Փաշինյանը հավելեց՝ քննարկումների սրությունը երբեք ժողովրդավարական հասարակություններում չի նվազելու և նվազեցնելու խնդիր դնելը սխալ է, բայց, այնուամենայնիվ, քննարկումները պետք է անցնեն հարգալից մթնոլորտում։
«Առաջիկայում էլ ընտրություններ են, նաև ընդդիմության դաշտի մեր գործընկերները պետք է համոզված լինեին, որ, եթե անցում կատարվեր որևէ բառապաշարի, մենք բառապաշարից չենք խեղճանա։ Պետք է առողջացնել միջավայրն ու մթնոլորտը։ Աղմուկի և այդ ամենի մեջ բովանդակությունը կորում է։ Մեզ պետք է ավելի շատ բովանդակության վրա կենտրոնալ, որ նախ դիմացինի ասածը հասկանանք, երկրորդ՝ սեփական ասածը դիմացինին հասկանալի դարձնենք»,- նշեց Փաշինյանը։