Մահացել է «Տանը մենակ» ֆիլմի դերասանուհի Քեթրին Օ’Հարան

71 տարեկանում մահացել է կանադա-ամերիկացի դերասանուհի, ռեժիսոր և սցենարիստ Քեթրին Օ’Հարան։

«Արմենպրես»-ի հաղորդմամբ՝ դերասանուհու մահվան մասին նրա մենեջերը հայտնել է Variety-ին։

Քեթրին Օ’Հարան առավել հայտնի է Քեյթ Մաքքալիսթերի՝ Քևինի մոր կերպարով «Տանը մենակ» և Տանը մենակ 2․ Նյու Յորքում կորածը» ֆիլմերում։ Նա մարմնավորել է նաև Դելիա Դիտցին Թիմ Բարթոնի «Բիթլջուս» ֆիլմում և վերադարձել է նույն կերպարին դրա 2024 թվականի շարունակությունում՝ «Բիթլջուս Բիթլջուս»։

Քեթրին Օ’Հարան ծնվել է 1954 թվականի մարտի 4-ին՝ Տորոնտոյում։ Հեռուստաէկրանին առաջին անգամ հայտնվել է 1979 թվականին՝ կանադական Canada After Dark շոուում։ 1970-ականներին հիմնականում զբաղվել է մուլտֆիլմերի հնչյունավորմամբ, իսկ 1976 թվականին նկարահանվել է The Rimshots հեռուստատեսային ֆիլմում և Coming Up Rosie մանկական հեռուստասերիալում։

Մեծ էկրանին նրա դեբյուտը տեղի է ունեցել 1980 թվականին՝ «Double Negative»  ֆիլմում։ Հետագա տարիներին Օ’Հարան սկսել է ստանալ ավելի նշանավոր դերեր․ 1985-ին խաղացել է «After Hours» թրիլերում, իսկ 1988-ին՝ Դելիա Դիտցի դերը «Բիթլջուս»-ում, որը դարձել է նրա առաջին խոշոր հաջողությունը։

1990 թվականին էկրան բարձրացավ Քրիս Կոլումբուսի «Տանը մենակ» ֆիլմը, որտեղ Օ’Հարան մարմնավորեց Քեյթ Մաքքալիսթերին՝ գլխավոր հերոս Քևինի մորը։ Դերասանուհին նույն կերպարին վերադարձավ նաև 1992 թվականի շարունակությունում։

Գրեթե 50-ամյա կարիերայի ընթացքում Քեթրին Օ’Հարան արժանացել է բազմաթիվ մրցանակների, այդ թվում՝ երկու «Էմմի»-ի և «Ոսկե գլոբուս»-ի։