Էրդողանը և Սաուդյան Արաբիայի թագաժառանգը քննարկել են հակամարտությունների կարգավորումը Եմենում, Սոմալիում և Գազայում
1 րոպեի ընթերցում
Թուրքիայի նախագահ Ռեջեփ Թայիփ Էրդողանը և Սաուդյան Արաբիայի թագաժառանգ Մուհամեդ բեն Սալմանը հեռախոսազրույցի ընթացքում քննարկել են հակամարտությունների կարգավորումը Եմենում, Սոմալիում և Գազայի հատվածում: Ինչպես հաղորդում է «Արմենպրես»-ը, այս մասին հայտնել է Turkiye Today թերթը։
Էրդողանը նշել է, որ Անկարան ուշադիր հետևում է իրադարձությունների զարգացմանը Սոմալիում և Եմենում՝ ընդգծելով, որ երկու երկրների տարածքային ամբողջականության պահպանումը կարևոր նշանակություն ունի տարածաշրջանային կայունության համար։
Թուրքիայի նախագահը հայտնել է Անկարայի պատրաստակամությունը Եմենում հակամարտող կողմերի մերձեցմանն ուղղված ջանքերում իր ներդրման հարցում։
Էրդողանը նաև ուշադրություն է դարձրել Գազայի հատվածում հումանիտար իրադրության վատթարացմանը՝ նշելով, որ պայմանները վատացել են ձմռան գալուն պես։ Նրա խոսքով՝ Թուրքիան շարունակում է աշխատել պաղեստինյան անկլավում մշտական հրադադարի հասնելու և այն վերականգնելու ուղղությամբ։
Բացի այդ, հեռախոսազրույցի ընթացքում Էրդողանն ընդգծել է Թուրքիայի հանձնառությունը Սաուդյան Արաբիայի հետ համագործակցությունը խորացնելու հարցում։