Վրաստանի և Ադրբեջանի արտգործնախարարները քննարկել են նաև Վրաստանով Հայաստան ադրբեջանական նավթամթերքի տարանցման հարցը
1 րոպեի ընթերցում
Դեկտեմբերի 29-ին հեռախոսազրույց է տեղի ունեցել Ադրբեջանի Հանրապետության արտաքին գործերի նախարար Ջեյհուն Բայրամովի և Վրաստանի արտաքին գործերի նախարար Մակա Բոչորիշվիլիի միջև։
Այս մասին, ինչպես հաղորդում է «Արմենպրես»-ը, հայտնում է ադրբեջանական «ԱՊԱ» լրատվական գործակալությունը:
Նախարարները քննարկել են երկու երկրների միջև բարեկամական և ռազմավարական գործընկերության ներկա վիճակը և հեռանկարները։ Նրանք ընդգծել են, որ առկա բարձր մակարդակի քաղաքական երկխոսությունը, ինչպես նաև տեղի ունեցած ինտենսիվ այցելությունները նպաստել են հարաբերությունների հետագա ամրապնդմանը։
Նշվել է հաջորդ տարի բարձր մակարդակի քաղաքական շփումների հետագա ընդլայնման կարևորությունը։
Կողմերը քննարկել են տարածաշրջանում առևտրի և հաղորդակցության վերաբերյալ հարցեր՝ ողջունելով այս ուղղությամբ ձեռնարկվող ջանքերը։
Նախարարները գոհունակությամբ նշել են Վրաստանի միջոցով ադրբեջանական նավթամթերքի Հայաստան արտահանման հետ կապված սակագնային հարցի շուրջ ձեռք բերված համաձայնությունը և ընդգծել այս ուղղությամբ աշխատանքները շարունակելու կարևորությունը։
Ջեյհուն Բայրամովը շնորհակալություն է հայտնել Վրաստանի ղեկավարությանը այս հարցի արագ լուծման համար։