Գևորգ Պապոյանն ու Համաշխարհային ներդրումային հիմնադրամի գլխավոր քարտուղարը քննարկել են Հայաստանի հնարավոր մասնակցությունը «AIM Congress» համաժողովին
1 րոպեի ընթերցում
Հայաստանի էկոնոմիկայի նախարար Գևորգ Պապոյանը դեկտեմբերի 25-ին ընդունել է AIM (Annual Investment Meeting) Համաշխարհային ներդրումային հիմնադրամի գլխավոր քարտուղար Վալիդ Ֆարղալին։ Հանդիպմանը ներկա է եղել նաև ՀՀ էկոնոմիկայի նախարարի տեղակալ Անուշիկ Ավետյանը։
Ինչպես «Արմենպրես»-ը տեղեկանում է Էկոնոմիկայի նախարարության տարածած հաղորդագրությունից, հանդիպման ընթացքում քննարկվել է Հայաստանի հնարավոր մասնակցությունը 2026 թվականի ապրիլին Դուբայում կայանալիք «AIM Congress» համաժողովին։
Քննարկվել են ազգային տաղավարի, նախարարական և թեմատիկ քննարկումներին մասնակցության հնարավորություններն ու ձևաչափերը։
Զրուցակիցներն անդրադարձել են Հայաստանի ներդրումային առաջնահերթություններին, խոշոր ենթակառուցվածքային և ռազմավարական նախագծերի ներկայացմանը միջազգային ներդրողներին, ինչպես նաև ֆոնդերի միջոցով ներդրումների ներգրավման ժամանակակից մոդելներին։
Կողմերը պայմանավորվել են շարունակել համատեղ աշխատանքը՝ Հայաստանի մասնակցության հնարավոր մոդելները հստակեցնելու և առաջիկայում համապատասխան առաջարկների ձևավորման ուղղությամբ։