Որ ընտրություններում մենք վարչական ռեսուրս օգտագործեցինք, պարտվելու ենք․ Փաշինյան
2 րոպեի ընթերցում
Վարչական ռեսուրսների կիրառումը հակասում է «Քաղաքացիական պայմանագիր» կուսակցության արժեքային սկզբունքներին։ «Արմենպրես»-ի հաղորդմամբ՝ կառավարության հարցուպատասխանի ժամանակ այս մասին ասաց ՀՀ վարչապետ Նիկոլ Փաշինյանը՝ անդրադառնալով իշխանության կողմից վարչական ռեսուրսի հնարավոր կիրառման վերաբերյալ հնչող քննադատություններին։
«Որ ընտրություններում մենք վարչական ռեսուրս ուզելով, թե չուզելով՝ այսինքն՝ անուղղակի կամ օգտագործելու փորձ անենք, այդ ընտրություններում մենք պարտվելու ենք։ Եվ սա եղել է, և կա իմ համոզմունքը։ Մենք վարչական ռեսուրս կիրառելո՞վ ենք Հայաստանում հեղափոխություն արել։ Ինչպե՞ս կարող է որևէ քաղաքական ուժ հրաժարվել իր հաջողության պատմությունից։ Այն քաղաքական ուժը, որը դա անի և մտածի, թե Սերժի ու Ռոբերտի հաջողության պատմությունը կարող է ավելի հետաքրքիր լինել, դա քաղաքական ինքնասպանություն է այդ ուժի և գործչի համար»,- նշեց Փաշինյանը։
Վարչապետը հիշեցրեց, որ 2021 թվականի խորհրդարանական ընտրությունները միջազգային հանրության կողմից ճանաչվել են որպես ազատ և մրցակցային ընտրություններ։
«Որտեղ մնանք մեր արժեքների շրջանակում, մենք այնտեղ միանշանակ հաղթելու ենք։ Այնտեղ, որտեղ մենք փորձենք քաղաքական տեխնոլոգիա կիրառել, պարտվելու ենք։ Մեր տեխնոլոգիան ժողովրդի՝ մեր նկատմամբ ունեցած վստահությունն է, օրգանական կապը և սերը մեր երկրի նկատմամբ»,- հավելեց նա։