1 րոպեի ընթերցում
Փարաքար խոշորացված համայնքի ավագանին հոկտեմբերի 7-ին արտահերթ նիստում նոր համայնքապետ ընտրեց։
«Արմենպրես»-ի հաղորդմամբ՝ Վալոդյա Գրիգորյանի մահից հետո կայացած նիստում ավագանու երեք խմբակցություններից թեկնածուներ չէին առաջադրվել։ Միակ առաջադրված թեկնածուն «Միասնություն» դաշինքը ներկայացնող Օնիկ Ախվերդյանն էր, որը ընտրվել է համայնքի ղեկավար։
Նիստի մեկնարկին ավագանու անդամները մեկ րոպե լռությամբ հարգել են սպանված համայնքապետ Վալոդյա Գրիգորյանի հիշատակը։
Սեպտեմբերի 23-ին Փարաքար համայնքի Մերձավան բնակավայրում հնչած կրակոցների հետևանքով սպանվել էր Փարաքար համայնքի ղեկավար Վալոդյա Գրիգորյանը։ Սպանվել էր նաև նրա ընկերը, ոստիկանության աշխատակից Կարեն Աբրահամյանը, ևս մեկ անձ՝ Արծրուն Գալստյանը, հրազենային վնասվածքներով տեղափոխվել էր հիվանդանոց։ Մերձավանում տեղի ունեցած սպանության դեպքով հարուցված քրեական գործի շրջանակներում երկու անձ կալանավորվել են։