Ուսուցչի աշխատանքից է մեծապես կախված մեր պետականության ապագան. ՀՀ նախագահն ընդունել է «Տարվա լավագույնները» մրցույթի հաղթող մանկավարժներին
2 րոպեի ընթերցում
Հայաստանի Հանրապետության նախագահ Վահագն Խաչատուրյանը նախագահական նստավայրում հյուրընկալել է ՀՀ կրթության, գիտության, մշակույթի և սպորտի նախարարության կողմից իրականացվող «Տարվա լավագույնները» մրցույթի 12 անվանակարգերում հաղթող ճանաչված ուսուցիչներին:
«Արմենպրես»-ի փոխանցմամբ՝ այս մասին հայտնում են Հանրապետության նախագահի աշխատակազմից՝ մանրամասնելով, որ ՀՀ նախագահը ողջունել և շնորհավորել է հաղթող ճանաչված մանկավարժներին:
Իր խոսքում Վահագն Խաչատուրյանը կարևորել է նման նախաձեռնությունների իրականացումը, որը վկայում է պետական իշխանության կողմից կրթության և այս ոլորտի աշխատողների նկատմամբ ցուցաբերվող առաջնահերթ վերաբերմունքի մասին:
Նախագահը շնորհակալություն է հայտնել նաև ուսուցիչներին տարիների նվիրական աշխատանքի համար և շեշտել, որ անգնահատելի է մանկավարժի դերակատարությունը գիտակից, պատասխանատու և ազատ հասարակության կերտման գործում:
«Ձեզանից և ձեր աշխատանքից է մեծապես կախված մեր պետականության ապագան, որովհետև ուսուցիչը միայն մեխանիկական գիտելիք փոխանցող չէ, այլ պատանի սերնդի մոտ կարևորագույն արժեհամակարգեր ստեղծող»,- նշել է Վահագն Խաչատուրյանը:
Հանդիպման ընթացքում նախագահն անդրադարձել է վերջին տարիներին կրթության և գիտության ոլորտներում կառավարության կողմից իրականացվող քաղաքականության առաջնահերթություններին, ապա պատասխանել ներկաներին հուզող հարցերին:
Հանդիպման ավարտին Վահագն Խաչատուրյանն Ուսուցչի օրվան ընդառաջ շնորհավորել է ուսուցիչներին մասնագիտական տոնի առթիվ և մաղթել նորանոր հաջողություններ: