1 րոպեի ընթերցում
Կոպենհագենում կայացել է Եվրամիության անդամ պետությունների արտգործնախարարների ոչ պաշտոնական հանդիպումը, որի ընթացքում քննարկվել է մոտ 300 մլրդ եվրոյի սառեցված ռուսական ակտիվների ճակատագիրը։ Ինչպես տեղեկացնում է «Արմենպրես»-ը, վկայակոչելով «Kommersant»-ը, Եվրոպական դիվանագիտության ղեկավար Կայա Կալասը հայտարարել է, որ նույնիսկ խաղաղության համաձայնագրի ստորագրման դեպքում այդ միջոցների վերադարձը Ռուսաստանին հնարավոր չէ առանց Ուկրաինային փոխհատուցում վճարելու։
ԵՄ-ի և G7-ի երկրների կողմից սառեցված ռուսական ակտիվներ գտնվում են հիմնականում բելգիական Euroclear համակարգում։ Բելգիայի արտգործնախարար Մաքսիմ Պրևոն Կոպենհագենում նշել է, որ երկիրը դեմ է ռուսական ակտիվների ցանկացած բռնագրավմանը։ Նրա խոսքով՝ ակտիվները Մոսկվայի նկատմամբ ճնշման լծակ են և պետք է սառեցված մնան այնքան ժամանակ, քանի դեռ Ռուսաստանը չի վճարել ամբողջ վնասը։
Պրևոն նաև տեղեկացրել է, որ Բելգիայի կառավարությունը հատկացրել է 100 մլն եվրո՝ ԱՄՆ-ից Ուկրաինայի զինված ուժերի համար զենք գնելու նպատակով։
Հունվար-հուլիս ամիսներին ԵՄ-ն Ուկրաինային է փոխանցել 10,1 մլրդ եվրո, որը ստացվել է Ռուսաստանի Կենտրոնական բանկի սառեցված միջոցների եկամուտներից։