ՀԷՑ-ի գործով որևէ մեկը որևէ տեղ չի կարող հաղթել ՀՀ-ին, ՀԷՑ-ը պետք է ծառայի ժողովրդին. Փաշինյան
3 րոպեի ընթերցում
Հայաստանի վարչապետ Նիկոլ Փաշինյանը բացառում է այն սցենարը, որ «Հայաստանի էլեկտրական ցանցեր» ՓԲԸ-ն շարունակի չծառայել Հայաստանի ժողովրդին, ինչպես, ըստ նրա, եղել է նախկինում` մինչև դրա ազգայնացման ուղղությամբ ՀՀ իշխանությունների կողմից քայլեր ձեռնարկելը։
«Արմենպրես»-ի փոխանցմամբ՝ Փաշինյանը նման համոզմունք հայտնեց կառավարության նիստից հետո լրագրողների հետ զրույցում:
«ՀԷՑ–ի գործով որևէ մեկը որևէ տեղ Հայաստանին չի կարող հաղթել: Այդ թեման վաղուց ավարտված թեմա է, և ՀԷՑ-ը պետք է ծառայի Հայաստանի Հանրապետության ժողովրդին: Բացառված սցենար է, որ ՀԷՑ-ը շարունակի չծառայել Հայաստանի Հանրապետության ժողովրդին»,–ասաց Փաշինյանը:
2025 թվականի հուլիսին Հայաստանի խորհրդարանն ընդունեց «Հայաստանի էլեկտրական ցանցեր» ընկերության պետականացմանը միտված նախագիծ։ Մինչ այդ ՀԷՑ-ի պետականացման անհրաժեշտության մասին խոսել էր ՀՀ վարչապետ Նիկոլ Փաշինյանը։
2025 թվականի հուլիսի 18-ին, հիմնվելով Ազգային ժողովի կողմից ընդունված օրենքի վրա, Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը ՀԷՑ-ի ժամանակավոր կառավարիչ էր նշանակել Ռոմանոս Պետրոսյանին, որը մինչ այդ զբաղեցնում էր ՀՀ պետական վերահսկողական ծառայության ղեկավարի պաշտոնը։
ՀԷՑ-ի սեփանակատերերը դիմել են Ստոկհոլմի արբիտրաժային դատարան՝ վիճարկելով ՀՀ իշխանությունների՝ վերը նշված որոշումները։
Սամվել Կարապետյանի պաշտպանության խորհուրդը հայտարարել է, որ Սամվել Կարապետյանը և իր ընտանիքը հաղթել են Հայաստանի Հանրապետության կառավարության դեմ նախաձեռնած արբիտրաժային հրատապ գործը։ՀՀ կառավարությունը հայտարարություն էր տարածել Ստոկհոլմի առևտրային պալատի արբիտրաժային ինստիտուտի հուլիսի 22-ի վճռի վերաբերյալ: Դրանում մասնավորապես ասվում էր. «Հարգանքով վերաբերվելով օտարերկրյա արբիտրաժների որոշումներով կիրառվող ապահովման միջոցներին, միևնույն ժամանակ բոլորը պարտավոր են առաջնորդվել նաև ՀՀ օրենսդրությամբ և միջազգային պայմանագրերով, որոնցով սահմանված են արբիտրաժային որոշումների ճանաչման և կատարման կարգերը և ընթացակարգերը»: