Ավստրալիան Իրանի դեսպանին անցանկալի անձ է հայտարարել, իսկ Թեհրանում իր դեսպանատան աշխատանքը՝ դադարեցրել
2 րոպեի ընթերցում
Ավստրալիան երկրում Իրանի դեսպան Ահմադ Սադեղիին հայտարարել է պերսոնա նոն գրատա, իսկ Իսլամական Հանրապետությունում Ավստրալիայի դեսպանատունը դադարեցնում է իր աշխատանքն` անվտանգության նկատառումներից ելնելով:
«Արմենպրես»-ի փոխանցմամբ՝ այդ մասին մամուլի ասուլիսի ժամանակ տեղեկացրել է Ավստրալիայի արտաքին գործերի նախարար Փենի Վոնգը։
Ըստ նրա՝ ավստրալական հետախուզությունը կարծում է, որ Իրանը կանգնած է Ավստրալիայում հրեական համայնքի նկատմամբ հակասեմական գրոհների հետևում:
Նրանք տվյալներ ունեն, որ Իրանը մասնակից է Մելբուռնում սինագոգի և Սիդնեյում ռեստորանի վրա գրոհներին:
«Անկասկած, ավստրալական հողում ագրեսիայի այդ աղաղակող և վտանգավոր գործողությունները, որոնք ղեկավարել է մեկ այլ պետություն, անցել են սահմանը: Հետևաբար, Իրանի դեսպանը հայտարարվել է պերսոնա նոն գրատա», -հայտարարել է Վոնգը:
Դիվանագետի խոսքով՝ Սադեղին և Իրանի ևս երեք ներկայացուցիչներ պետք է Ավստրալիան լքեն յոթ օրվա ընթացքում:
Նախարարն ընդգծել է, որ Կանբերան մտադիր է Իրանի հետ որոշակի դիվանագիտական կապեր պահպանել:
Երկրորդ համաշխարհային պատերազմից հետո ընկած ժամանակաշրջանում սա առաջին դեպքն է, երբ Ավստրալիայից այլ երկրի դեսպան է արտաքսվում: Թեհրանում գտնվող ավստրալիացի դիվանագետներն ավելի վաղ տարհանվել էին երրորդ երկրներ: