368.59
Փոխվարչապետ Տիգրան Խաչատրյանը մասնակցել է Շինարարի օրվա միջոցառմանը
2 րոպեի ընթերցում
Փոխվարչապետ Տիգրան Խաչատրյանն օգոստոսի 8-ին մասնակցել է Շինարարի օրվա առթիվ կազմակերպված միջոցառմանը:
«Արմենպրես»-ի հաղորդմամբ՝ այս մասին հայտնում են ՀՀ վարչապետի աշխատակազմի Տեղեկատվության և հասարակայնության հետ կապերի վարչությունից։
Շնորհավորելով շինարարներին մասնագիտական տոնի առթիվ՝ փոխվարչապետը բարձր է գնահատել ամենօրյա պատասխանատու աշխատանքով պետության զարգացմանն ու առաջընթացին նպաստելու և դրա մասը կազմելու վերջիններիս պատրաստակամությունը։
Անդրադառնալով վերջին տարիներին շինարարության ծավալների աննախադեպ աճին՝ Տիգրան Խաչատրյանը նկատել է, որ այն նպաստել է ոլորտի կազմակերպությունների կարողությունների ավելացմանը, այդ թվում՝ տեխնիկական վերազինման և առավել արտադրողական գործելակարգերի կիրառման միջոցով։
Փոխվարչապետը վստահություն է հայտնել, որ նկատվող որակական փոփոխությունները ամուր հիմք կապահովեն ոլորտի զարգացման շարունակականությունն ապահովելու և դեռևս չօգտագործված ներուժը լավագույնս իրացնելու տեսանկյունից։
Անդրադառնալով Կառավարության՝ կապիտալ շինարարության ծավալները ընդլայնելու հաստատակամությանը՝ փոխվարչապետը վերահաստատել է, որ որակյալ աշխատանքը և աշխատանքի պատշաճ արագությունը շարունակելու են ներկայանալ որպես իրականացվող կապիտալ ծրագրերին մասնակցելու հիմնական նախապայմաններ։
Շնորհավորական ելույթներով հանդես են եկել նաև Կրթության, գիտության, մշակույթի և սպորտի նախարար Ժաննա Անդրեասյանը, Քաղաքաշինության կոմիտեի նախագահ Եղիազար Վարդանյանը, Երևանի քաղաքապետի տեղակալ Սուրեն Գրիգորյանը, Հայաստանի շինարարների միության նախագահ Վահան Հարությունյանը:
Ելույթներին հաջորդել է պարգևատրման արարողությունը:
Բաժանորդագրվեք մեր ալիքին Telegram-ում