1 րոպեի ընթերցում
Պակիստանի Փանջաբի նահանգում հուլիսի 16-ից սկսված հեղեղումների հետևանքով առնվազն 63 մարդ է զոհվել, վիրավորվել է 290-ը։ «Արմենպրես»-ի փոխանցմամբ՝ այս մասին հայտնում է BBC-ն։
Աղետների ազգային վարչության տվյալներով՝ զոհերի մեծ մասը տուժել է շենքերի փլուզումից, մյուս մասը կա՛մ խեղդվել, կա՛մ էլեկտրահարվել է։
Մուսսոնային անձրևների պատճառով Փանջաբում փակվել են մի քանի արագընթաց ճանապարհներ և չեղարկվել կամ հետաձգվել են տասնյակ չվերթեր։
Մայրաքաղաք Իսլամաբադին մոտ գտնվող Ռավալպինդի քաղաքի իշխանությունները մարդկանց տանը պահելու նպատակով հուլիսի 17-ը հայտարարել են ոչ աշխատանքային օր, իսկ քաղաքով անցնող գետի ափին ապրողներին խնդրել են տարհանվել։
Հունիսի վերջին սկսված մուսսոնային անձրևների հետևանքով երկրում զոհերի թիվը հասել է գրեթե 180-ի, որոնց կեսից ավելին երեխաներ են։
Մոտ 250 միլիոն բնակչություն ունեցող Պակիստանը կլիմայի փոփոխության նկատմամբ ամենախոցելի երկրներից մեկն է։
Պակիստանում է նաև գտնվում ավելի քան 13 000 սառցադաշտ, որոնք հալչում են արագացված տեմպերով։