Վրաստանում թմրանյութերի ապօրինի շրջանառության մի քանի ցանց է բացահայտվել

Վրաստանի ոստիկանությունը հատուկ գործողության արդյունքում թմրանյութերի վաճառքի և պահպանման համար ձերբակալել է 34 մարդու։

«Արմենպրես»-ի հաղորդմամբ՝ այս մասին հայտնում է Sputnik գործակալության վրացական ծառայությունը՝ մանրամասնելով, որ Վրաստանի ներքին գործերի նախարարության տվյալներով՝ հատուկ գործողությունը իրականացվել է ամբողջ երկրում, և ձերբակալվածների թվում հիմնականում եղել են թմրանյութ վաճառողներ, այդ թվում՝ խոշոր, ինչպես նաև թմրանյութեր պահողներ։ 

Նշվում է, որ քննության արդյունքում պարզվել է՝ ձերբակալվածները, որոնց թվում կան նաև օտարերկրյա քաղաքացիներ, մասնակցել են թմրանյութերի վաճառքի տարբեր սխեմաների։ 

Բացի այդ, Վրաստանի ոստիկանությունը հայտնել է, որ ձերբակալվածների, նրանց տների ու բնակարանների խուզարկության ժամանակ հայտնաբերվել են տարբեր թմրանյութեր, այդ թվում՝ հերոին, կոկաին, սուբօքսին, մեթադոն և «ալֆա-ՊՎՊ», հայտնաբերվել է նաև զենք և զինամթերք։ 

Նշվում է, որ եթե ձերբակալվածների մեղավոր ճանաչվելու դեպքում, նրանց սպառնում է մինչև 20 տարվա ազատազրկում կամ ցմահ ազատազրկում։