383.74
3 րոպեի ընթերցում
75-ամյա Տարասավիլ Գրիգորյանը մի ամբողջ կյանք է ապրել՝ չպատկերացնելով այն առանց ծխախոտի, բայց թոքի քաղցկեղի հայտնաբերումից և վիրահատությունից հետո լիովին հրաժարվել է հիվանդության առաջացման և ամենատարածված պատճառներից մեկից՝ ծխախոտից:
«Արմենպրես»-ի հետ զրույցում Տարասավիլ Գրիգորյանը նշեց՝ մինչև տարօրինակ դրսևորումներով հազի առաջանալը որևէ գանգատ չի ունեցել, իսկ հիվանդության ի հայտ գալուց հետո ախտորոշումն ու վիրահատությունը տևել է մեկ ամիս: Բուժառուն նշեց՝ բավականին երկար տարիներ ծխել է՝ երբևէ չմտածելով, թե ինչ հետևանքներ կարող են լինել. նրա խոսքով՝ եթե չլիներ ահազանգող հազը, հնարավոր է՝ ամեն ինչ այլ ավարտ ունենար:
Նա նշեց՝ այժմ իր մաշկի վրա է զգացել ծխելու բացասական հետևանքները՝ հորդորելով բոլորին թողնել առողջության վրա լուրջ ազդեցություն ունեցող ամենամեծ կախվածությունը:
75-ամյա բուժառուին բուժող բժշկի` ՀՀ ԱՆ Վ.Ա. Ֆանարջյանի անվան Ուռուցքաբանության ազգային կենտրոնի Կրծքավանդակային վիրաբուժության և ինտերվենցիոն թոքաբանության բաժանմունքի ղեկավար, թորակալ վիրաբույժ Տիգրան Բյուզանդյանի խոսքով՝ տվյալ կլինիկական դեպքը բացառիկ չէ, սակայն մեկ մարդու պատմությամբ կարելի է պատկերացնել ընդհանուր փիլիսոփայությունը և փորձել չծխել ու դիմել բժշկին՝ առաջին իսկ գանգատների պարագայում:
Մասնագետն ընդգծեց՝ տվյալ օրինակն ի գիտություն ունենալով՝ պետք է հետազոտվել ժամանակին, հատկապես, եթե ռիսկի խմբում ես: Բժշկի խոսքով՝ թոքի քաղցկեղի առաջացման հիմնական ռիսկի մոտ 80 տոկոսը ծխախոտի ծուխն է, հետևաբար՝ ոչ պակաս վնասակար է նաև երկրորդային ծխի ազդեցությունը:
«Թոքի քաղցկեղն առավել շատ հանդիպում է տղամարդկանց շրջանում, իսկ թիրախային տարիքային խումբը համարվում է 50-70 տարեկանը: Սքրինինգային ծրագրերում էլ ընդգրկվում են հենց այս տարիքային խմբի՝ առնվազն 20 տարի և դրանից երկար ժամանակ ծխող քաղաքացիները, որոնք համարվում են ռիսկի խումբ»,- ասաց Տիգրան Բյուզանդյանը:
Մասնագետը ցավով նշեց, որ Հայաստանում թոքի քաղցկեղը հիմնականում հայտնաբերվում է չորրորդ փուլում:
Նշենք, որ Առողջապահության համաշխարհային կազմակերպության հետազոտության համաձայն՝ ծխելու հետևանքով առաջացած հիվանդությունները մահվան 2-րդ ամենատարածված պատճառն են: