Հյուսիսային Կորեայի առաջնորդին զայրացրել է 5000 տոննա տարողությամբ ականակրի մեկնարկի ժամանակ տեղի ունեցած խոշոր վթարը
2 րոպեի ընթերցում
Հյուսիսային Կորեայի առաջնորդ Կիմ Չեն Ընը դատապարտել է նորակառույց 5000 տոննա տարողությամբ ականակրի մեկնարկի ժամանակ տեղի ունեցած խոշոր վթարը՝ դա անվանելով «լուրջ վթար» և «հանցավոր արարք»։ «Արմենպրես»-ի փոխանցմամբ՝ այս մասին հայտնում է Կորեական կենտրոնական լրատվական գործակալությունը (KCNA)։
Կիմ Չեն Ընն անձամբ ներկա է գտնվել արարողությանը և հայտարարել, որ վթարը վնասել է ազգի արժանապատվությունն ու հպարտությունը։ Նա նշել է, որ հաջորդ ամիս կանցկացվի կուսակցության լիագումար նիստ, և զգուշացրել է, որ մեղավորները կպատժվեն։
Չունցզինի նավաշինարանում մայիսի 21-ին տեղի է ունեցել ականակրի մեկնարկի արարողությունը։ Ըստ տեղեկությունների՝ վթարը տեղի է ունեցել վատ հրամանատարության և շահագործման սխալների պատճառով։ Մասնավորապես, նավը տեղափոխող սայլակն անհավասար է շարժվել, ինչը հանգեցրել է նրան, որ հետևի հատվածը վաղ է դուրս է եկել սահուղուց։ Արդյունքում նավը բախվել է խոչընդոտի, վնասել հատակը և կորցրել հավասարակշռությունը, իսկ նավի քթային հատվածն այդպես էլ չի մտել ջուրը։
«Սա լուրջ և անընդունելի վթար է, որն անփութության, անպատասխանատվության և ոչ գիտական գործունեության արդյունք է, - ասել է Կիմ Չեն Ընը։ - Սա մի բան է, որը երբեք չպետք է տեղի ունենար և չի կարելի հանդուրժել»։
Նա զգուշացրել է, որ մեղավորները կենթարկվեն կարգապահական պատասխանատվության։
Հյուսիսային Կորեայի առաջնորդը նաև շեշտել է, որ ականակրի հնարավորինս շուտ վերականգնումը ոչ միայն գործնական, այլև քաղաքական հարց է, որն անմիջականորեն կապված է պետության հեղինակության հետ։