ՀՌՀ նախագահն ընդգծեց հանրային մուլտիպլեքսում օտարերկրյա հեռուստածրագրերի հեռարձակումը սահմանափակելու անհրաժեշտությունը
2 րոպեի ընթերցում
Հեռուստատեսության և ռադիոյի հանձնաժողովի նախագահ Տիգրան Հակոբյանը ընդգծեց օտարերկրյա հեռուստածրագրերի հեռարձակման սահմանափակման անհրաժեշտությունը՝ նշելով, որ առանց օրենսդրական փոփոխությունների հնարավոր չէ կանխել այլ երկրների քաղաքական օրակարգերի ներթափանցումը հայկական տեղեկատվական դաշտ։
«Շատ կարևոր ենք համարում օտարերկրյա հեռուստածրագրերի հեռարձակման խիստ կանոնակարգումը։ Անհրաժեշտ են օրենսդրական փոփոխություններ, որոնք կբացառեն այլ երկրների քաղաքական օրակարգերի սպասարկումը հանրային մուլտիպլեքսում՝ բացառությամբ այն ծրագրերի, որոնք ունեն մանկական կամ մշակութային բնույթ և հայերեն թարգմանություն՝ առնվազն լուսագրերով»,- «Արմենպրես»-ի հաղորդմամբ՝ հայտարարեց Հակոբյանը։
Նա հիշեցրեց ռուսաստանյան հեռուստածրագրերի բովանդակության շուրջ հասարակական դժգոհությունները՝ նշելով, որ իրավիճակն ավելի հեշտ կլիներ կանխել, եթե տարիներ առաջ քաղաքական կամք լիներ նման ծրագրերի մուտքը սահմանափակելու հարցում։
«Որպեսզի պարզ լինի, մեր խնդիրը ոչ թե միայն ռուսական ծրագրերի արգելափակումն է, այլ ընդհանրապես օտարերկրյա ծրագրերի խիստ սահմանափակումը։ Օրինակ՝ ֆրանսիական ARTEfr հեռուստաընկերությունը Հարավային Կովկասի քարտեզը ներկայացրել էր առանց Հայաստանի։ Այժմ այդ հեռուստաընկերությունը ցանկանում է մուտք գործել հայկական մուլտիպլեքս։ Նման պարագայում, եթե թույլատրենք ֆրանսիական կողմին, ստիպված կլինենք թույլատրել մյուս դաշնակիցներին և բարեկամ երկրներին։ Դրա հետևանքով՝ հանրային մուլտիպլեքսը, որը ստեղծվել է հարկատուների միջոցներով, կդառնա այդ միջպետական բախումների, տեղեկատվական պատերազմների թատերաբեմ»,- նշեց նա։