Հյուսիսային Կորեան ԱՄՆ-ին «լուրջ հետևանքներով» է սպառնում Հարավային Կորեայի հետ զորավարժությունների պատճառով
2 րոպեի ընթերցում
Հյուսիսային Կորեայի պաշտպանության նախարարությունը հայտարարել է, որ տարածաշրջանում ԱՄՆ-ի և Հարավային Կորեայի զորավարժությունները կարող են բացասական հետևանքներ ունենալ նրանց համար։ «Արմենպրես»-ի փոխանցմամբ՝ գերատեսչության հայտարարությունը հրապարակել է Կորեայի կենտրոնական լրատվական գործակալությունը:
«ԿԺԴՀ-ի պաշտպանության նախարարությունը խստորեն նախազգուշացնում է, որ ԱՄՆ-ի բլեֆային ռազմական գործողությունները, որոնք լուրջ վտանգ են ստեղծում մեր պետության ինքնիշխանության և տարածաշրջանի իրադրության համար, անխուսափելիորեն…. լուրջ բացասական հետևանքների կհանգեցնեն նաև իրենց երկրի անվտանգային իրադրության համար», - ասվում է հայտարարության մեջ։
Նշվում է, որ Փհենյանը «զսպման ճնշող ուժերի կիրառմամբ» կստիպի ԱՄՆ-ին գիտակցել, որ որքան բարձր լինի ԿԺԴՀ-ի դեմ սադրանքների մակարդակը, այնքան բարձր կլինի վտանգի մակարդակը Վաշինգտոնի համար։
«ԿԺԴՀ-ի զինված ուժերը ոչ մի դեպքում թույլ չեն տա թշնամական ուժերի կողմից պետության ինքնիշխանության ու անվտանգության համար ամենաչնչին իսկ սպառնալիք և հզոր ուժ կկիրառեն՝ զսպելու Միացյալ Նահանգների ագրեսիվ մտադրությունները», - ընդգծել են նախարարությունում։
ԿԺԴՀ-ի պաշտպանության նախարարությունը նման հայտարարություն է հրապարակել՝ ի պատասխան Կորեայի Հանրապետության և ԱՄՆ-ի համատեղ օդային վարժանքների, որոնք անցկացվել են ամերիկյան B-1B ռմբակոծիչների մասնակցությամբ: