Հունական մի քանի կղզիներում հեղեղումների պատճառով փակվել են դպրոցները

Հունական Պարոսում, Միկոնոսում, Կրետեում, ինչպես նաև Էգեյան ծովի մի քանի այլ կղզիներում փոթորկի պատճառով հեղեղումներ են առաջացել։ Իշխանությունները փակել են դպրոցները և սահմանափակել երթևեկությունը։ 

«Արմենպրես»-ի փոխանցմամբ՝ Ekathimerini պարբերականը հաղորդում է, որ հորդառատ անձրևները, որոնք ուղեկցվում են քամիներով և կարկուտով, ընդմիջումներով կշարունակվեն մինչև ապրիլի 2-ի կեսօր։

Պարոսում մարտի 31-ից գործում է երթևեկության արգելք բոլոր ճանապարհներին։ Թույլատրվում է միայն արտակարգ ծառայությունների մեքենաների տեղաշարժը։ Ճանապարհներով հոսող հեղեղաջրերը քշել-տարել են մեքենաները։ Հրշեջները ջրհեղեղի պատճառով փակուղում հայտնված 13 մարդու կարողացել են ապահով տեղափոխել իրենց տներ։ 

Տուժածների կամ անհետ կորածների մասին առայժմ ոչինչ չի հաղորդվել։