1 րոպեի ընթերցում
Մյանմայի Միության Հանրապետությունը մեկշաբաթյա ազգային սուգ է հայտարարել երկրում տեղի ունեցած ավերիչ երկրաշարժի պատճառով, որը շուրջ 1700 մարդու կյանք է խլել: Ինչպես «Արմենպրես»-ը տեղեկանում է «ՌԻԱ Նովոստի» գործակալությունից, այդ մասին հայտարարել է Մյանմայի Միության Հանրապետության պետական վարչական խորհրդի նախագահ, վարչապետ և ավագ գեներալ Մին Աուն Հլայնը։
«Ցավակցություն հայտնելով մարդկային զոհերի և կորստի կապակցությամբ՝ յոթ օր՝ 31.03.2025-ից մինչև 06.04.2025-ը, սգո օրեր են հայտարարվել ազգային մակարդակով: Ազգային դրոշը պետք է խոնարհվի այս օրերին», - ասվում է Մին Աուն Հլայնի հայտարարության մեջ:
Երկրաշարժի զոհերի թիվը հասել է 1700-ի, 3400 մարդ վիրավորվել է, ավելի քան 300 մարդ անհետ կորած է։
Մարտի 28-ին Մյանմայում տեղի է ունեցել երկու հզոր երկրաշարժ՝ համապատասխանաբար 7,7 և 6,4 մագնիտուդով։ Ցնցումները զգացվել են նաև հարևան Թաիլանդում, ինչպես նաև Չինաստանում, Կամբոջայում, Բանգլադեշում և Հնդկաստանում։