Աշխատանքային մթնոլորտում լուծվող հարց է. նախարարը՝ Լարսում արտահանողների համար առաջացած խնդիրների մասին
2 րոպեի ընթերցում
Էկոնոմիկայի նախարար Գևորգ Պապոյանն անդրադարձել է Վերին Լարսի անցակետի վրացական կողմում Հայաստանից որոշ արտահանողների համար առաջացած խնդիրներին ու դրանց լուծման ուղղությամբ տարվող աշխատանքներին:
«Արմենպրես»-ի հաղորդմամբ՝ ԱԺ–կառավարություն հարցուպատասխանին «Քաղաքացիական պայմանագիր» խմբակցության պատգամավոր Դավիթ Կարապետյանն ասաց. «Արդեն շուրջ 1 ամիս է, ինչ հարևան Վրաստանի տարածքում անհարկի և անհասկանալի քաշքշուկներ են առաջանում հայկական ծագման բեռներով բեռնված մեքենաների, մասնավորապես, ծաղիկ տեղափոխող մեքենաների համար: Լարսի անցակետում վրացի մաքսային ծառայողները բեռնատարները հետ են վերադարձնում, ասում են, որ պետք է դեպի Թբիլիսի տանեն, որտեղ պետք է հավելյալ զննություն անցկացվի»:
Պատգամավորը նշեց, որ նման իրավիճակն անհնարին ու աննպատակահարմար է դարձնում տնտեսավարողների արտահանումները դեպի Ռուսաստան:
«Խնդրի մասին տնտեսավարողները մեզ տեղեկացրել են: Եվ մենք ակտիվ աշխատում ենք Վրաստանի մեր գործընկերների հետ: Նախնական դիրքորոշումը հետևյալն է՝ օրենսդրությանը համապատասխան աշխատանքներ են իրականացվում»,–ասաց Գևորգ Պապոյանը:
Նախարարի խոսքով՝ պատգամավորի մատնանշած դեպքերն առանձին դեպքեր են, կապված են առանձին կազմակերպությունների հետ, ընդհանուր դեպքեր չեն:
«Բայց աշխատում ենք: Կարծում եմ՝ մոտակա օրերին լուծում կունենանք: Աշխատանքային մթնոլորտում լուծվող հարց է»,– նշեց Պապոյանը: