Դեսպան Տիգրան Մկրտչյանը հանդիպել է «Enterprise Greece»-ի տնօրենի հետ

Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանը հանդիպել է «Enterprise Greece»-ի տնօրեն Մարինոս Յանոպուլոսին։

«Արմենպրես»-ի փոխանցմամբ՝ այս մասին հաղորդագրություն է տարածել Հունաստանում Հայաստանի դեսպանությունը։ 

Զրուցակիցներն անդրադարձել են տնտեսական դիվանագիտության դերին երկու երկրների հարաբերությունների զարգացման գործում՝ հաշվի առնելով երկուստեք ներդրումների և առևտրի զարգացման մեծ ներուժը։ 

Դեսպան Մկրտչյանը զրուցակցին է փոխանցել Հայաստանի ներդրումային քաղաքականության ամփոփագիրը և խնդրել ուսումնասիրել Հայաստանում ներդրումներ կատարելու հնարավորությունները։ Նա ընդգծել է, որ Հայաստանի համար առաջնային նշանակություն ուղղություններից են բարձր տեխնոլոգիաները, կրթությունը և զբոսաշրջությունը։ 

Պայմանավորվածություն է ձեռք բերվել առաջիկայում ակտիվացնել շփումները Enterprise Greece-ի և Enterprise Armenia-ի միջև՝ նախորդ տարվա ընթացքում ստորագրված փոխգործակցության հուշագրի հիման վրա։