«Իմ Քայլը» հիմնադրամն ու Մատենադարանը միավորում են ջանքերը կրթական և մշակութային ծրագրերի իրականացման համար
1 րոպեի ընթերցում
«Իմ Քայլը» հիմնադրամը և «Մատենադարան» Մեսրոպ Մաշտոցի անվան հին ձեռագրերի գիտահետազոտական ինստիտուտ» հիմնադրամը մարտի 4-ին ստորագրել են համագործակցության հուշագիր՝ միավորելով ուժերը կրթության, ինքնակրթության և մշակութային ժառանգության պահպանման ոլորտներում։ Հուշագիրը ստորագրվեց «Իմ Քայլը» հիմնադրամի փոխտնօրեն Թալին Թօփալաքեանի և գիտահետազոտական ինստիտուտի տնօրեն Արա Խզմալյանի միջև:
Ինչպես «Արմենպրես»-ը տեղեկանում է «Իմ Քայլը» հիմնադրամի տարածած հաղորդագրությունից, հուշագրի շրջանակում նախատեսվում է համատեղ ծրագրերի իրականացում, մասնագիտական վերապատրաստումներ, հանրային իրազեկմանն ուղղված միջոցառումներ, ինչպես նաև փոխադարձ աջակցություն մշակութային և կրթական նախաձեռնություններին։
Համագործակցությունը միտված է կրթության դերի բարձրացմանը, մասնագիտական կարողությունների զարգացմանը և նոր հմտությունների ձեռքբերմանը՝ ստեղծելով ինքնակրթության համար ավելի բարենպաստ միջավայր։ Այսուհետ գործընկեր դարձած հիմնադրամները կարող են համատեղ ձևավորել աշխատանքային խմբեր, ներկայանալ այլ համատեղ ծրագրերով ՝ ըստ անհրաժեշտության։