Համահայկական ձմեռային երկրորդ խաղերի առաջին մեդալակիրները հայտնի են

Համահայկական ձմեռային երկրորդ խաղերի առաջին ոսկե մեդալակիրները Հայաստանի դահուկասպորտի ընտրանու անդամներն են:

«Արմենպրես»-ի հաղորդմամբ` Ջերմուկ քաղաքում մեկնարկեցին Համահայկական ձմեռային երկրորդ խաղերի մի քանի մարզաձևերի մրցաշարերը:

Պայքարի մեջ մտան դահուկավազքում, ձնամարտում, շախմատում, սպորտային պարերում մրցող մարզիկները:

Համահայկական ձմեռային երկրորդ խաղերի առաջին մեդալակիրները դահուկորդներն են: Տղամարդկանց ազատ ոճում ոսկե մեդալակիր դարձավ Հայաստանի դահուկավազքի հավաքականի անդամ, Օլիմպիական խաղերի կրկնակի մասնակից Միքայել Միքայելյանը, ով ներկայացնում էր Աշոցքը: Երկրորդ տեղում Սպարտակ Ոսկանյանն է, իսկ եռյակը եզրափակում է Թադևոս Պողոսյանը: Երկուսն էլ Աշոցքից են:

Կանանց ազատ ոճում առաջին տեղում Հայաստանի բազմակի չեմպիոն Կատյա Գալստյանն է Աշոցքից: Երկրորդ տեղում Վասելինա Խաչատուրյանն է Սոչիից, և երրորդը Ռոզա Սիմոնյանն է Գյումրուց: